Analisti politik Blerim Latifi ka kritikuar gjendjen e arsimit në Kosovë, duke thënë se qeveritë ndër vite, përfshirë edhe atë aktuale, nuk e kanë marrë seriozisht këtë sektor.
Latifi ka shkruar se qeveritë janë mjaftuar me administrimin e gjendjes ekzistuese dhe me premtime për të ardhmen.
Ai ka kritikuar edhe prindërit, duke thënë se shpesh nuk arrijnë t’i bindin fëmijët për rëndësinë e arsimimit cilësor, ndërsa fëmijët, të ndikuar nga bota digjitale, e shohin shkollën si një detyrim të mërzitshëm.
Sipas Latifit, problem të madh paraqesin edhe tekstet mësimore, veçanërisht ato për klasat e ulëta, të cilat i ka cilësuar si metodologjikisht të dobëta.
“Teksti nuk kuptohet sepse nuk mendohet. Vetëm qeniet që mendojnë mund të kuptojnë”, ka shkruar Latifi.
Ai ka kritikuar gjithashtu ndikimin e rrjeteve sociale, duke thënë se algoritmet promovojnë modele të njerëzve pa dije dhe arsimim, të cilët bëhen të famshëm dhe të admiruar.
Në fund, Latifi ka paralajmëruar se një shoqëri që shpërblen analfabetët rrezikon të shndërrohet në një shoqëri analfabetësh, me pasoja për liritë, demokracinë dhe zhvillimin e vendit.
The post Latifi: Qeveritë kurrë nuk e kanë marrë seriozisht arsimin në Kosovë appeared first on Gazeta Express.
