Ish-kryediplomati shqiptar, Ditmir Bushati, ka reaguar për organizimin e shtetit serb për varrosjen e kriminelit të luftës, Ratko Mlladiq.
Bushati ka shkruar se ceremonia shtetërore tregon se ai nuk po trajtohet si një kriminel lufte dhe një gjë e tillë shpërfaq faktin se Serbia refuzon të përballet me politikat që kanë çuar në ngjarjet e tmerrshme të viteve te 90-ta.
“Ceremonia shtetërore për sjelljen e trupit të vdekur të Ratko Mlladiçit në Serbi, tregon se vdekja e tij nuk po trajtohet si ikja nga jeta e një krimineli lufte të dënuar nga drejtësia ndërkombëtare. Përkundrazi, vdekja e tij ka nxjerrë në pah edhe njëherë refuzimin e Serbisë për t’u përballur me politikat që çuan në luftërat e viteve ’90, dhe me pasojat e tyre. Në vend që të pranojë përgjegjësitë, Serbia flet për ‘padrejtësi historike ndaj serbëve’”, ka shkruar ai.
Tutje sipas Bishatit, është e qartë se kjo qasje politike nuk mori fund me Sllobodan Millosheviçin, e as me vendimet e drejtësisë ndërkombëtare.
“Serbia nuk mund të ndërtojë një identitet demokratik të qëndrueshëm e as të konsiderohet faktor stabiliteti në rajon pa pranuar përgjegjësië për luftërat e viteve ’90. Ato nuk ishin rezultat i padrejtësive historike, por pasojë e politikave të ndjekura nga Beogradi. Prandaj, demokratizimi dhe europianizimi i Serbisë dhe rajonit kërkon një shkëputje rrënjësore nga ideologjia që justifikon krimet e luftës dhe gjenocidit”, ka potencuar ai.
“Mlladiç vdiq, ndërsa ideologjia që e shndërroi atë në hero vazhdon të jetojë. Prandaj, pyetja nuk është më se deri ku mund të shkojë mohimi i krimeve të luftës apo glorifikimi i kriminelëve. Pyetja është: Ku është fundi? Dhe një pyetje po aq e rëndësishme duhet t’i drejtohet komunitetit ndërkombëtar: Edhe për sa kohë do të trajtohen glorifikimi i kriminelëve të dënuar të luftës, si dhe mohimi e relativizimi i gjenocidit, thjesht si një tjetër mosmarrëveshje politike në Ballkan?”, ka përfunduar Bushati.
The post Varrosja e kriminelit Mlladiq me ceremoni shteti, Bushati: Serbia refuzon përballjen me pasojat e politikës së viteve 90-ta appeared first on Gazeta Express.
