Policia e Kosovës, përveç rasteve kur zbulon armë të paligjshme gjatë kontrolleve nëpër shtëpi, po përballet edhe me raste kur qytetarët i dorëzojnë ato në mënyrë vullnetare.
Kështu ka deklaruar për Veritasinfo Erduan Buliqi, shef i Departamentit të Planifikimit Operacional në Drejtorinë Rajonale të Policisë së Kosovës në Mitrovicë.
Buliqi ka thënë se dorëzimi vullnetar i armëve është evidentuar edhe si rezultat i bashkëpunimit të Policisë me qytetarët, përfshirë pjesëtarë të komunitetit serb.
“Po ashtu kemi raste kur gjejmë armatim nëpër shtëpi të banuara, por kemi edhe raste kur vullnetarisht qytetarët i dorëzojnë ato”, ka deklaruar Buliqi.
Sipas tij, bashkëpunimi dhe komunikimi me komunitetin mund të japin rezultate konkrete në forcimin e sigurisë dhe parandalimin e qarkullimit të armëve të paligjshme.
Në komunat me shumicë serbe, komunikimi i drejtpërdrejtë me qytetarët shihet si një element i rëndësishëm i punës së institucioneve të sigurisë, pasi në raste të caktuara armët janë dorëzuar pa qenë të nevojshme kontrollet apo operacionet policore.
Në fund të gushtit, Policia e Kosovës kishte ekspozuar një arsenal të madh armësh të sekuestruara në disa lokacione në Zubin-Potok. Gjatë operacionit në 48 lokacione ishin sekuestruar 72 armë, shtatë mjete shpërthyese, shtatë granata dore dhe 4 mijë e 831 copë municion, ndër të tjera.
