Frika për një përshkallëzim të ri të konfliktit është rritur të mërkurën në Lindjen e Mesme, pasi Shtetet e Bashkuara dhe Irani kanë shkëmbyer sulmet më të mëdha që nga korriku.
SHBA-ja goditi objektiva në bregdetin jugor të Iranit, ndërsa Teherani sulmoi baza amerikane në disa vende të rajonit.
Irani akuzoi SHBA-në se gjatë sulmeve ka goditur edhe një dasmë, duke vrarë katër persona dhe plagosur dhjetëra të tjerë. Ministri iranian i Shëndetësisë më vonë deklaroi se në valën e fundit të sulmeve amerikane janë vrarë gjithsej 18 persona dhe janë plagosur 108 të tjerë.
Ushtria amerikane tha se sulmet e saj kishin në shënjestër sistemet e mbrojtjes ajrore, radarët, pajisjet detare, kapacitetet për vendosjen e minave dhe objektet e komunikimit. Irani raportoi sulme ndaj disa objektivave pranë Ngushticës së Hormuzit.
Përshkallëzimi rrezikon ta zgjerojë edhe më tej konfliktin, i cili ka vazhduar që nga sulmet amerikane ndaj Iranit në shkurt. Përplasjet kanë ndikuar edhe në furnizimet globale me energji dhe kanë shkaktuar kundërshtim të gjerë në mesin e amerikanëve, në prag të zgjedhjeve për Kongres në nëntor.
“Natën e kaluar ishte si fundi i botës”, tha për Reuters Mahmoud, 38 vjeç, punonjës komunal në qarkun Sirik, pranë Ngushticës së Hormuzit, duke përshkruar sulmet në zonën ku ndodhet edhe qyteti ku raportohet se u godit dasma.
Presidenti amerikan Donald Trump deklaroi se SHBA-ja e kishte goditur Iranin “shumë fort”, ndërsa e cilësoi kundërpërgjigjen iraniane si një “goditje dashurie”.
“Sulmi i mbrëmshëm ishte shumë i rëndë dhe ne jemi të gatshëm të kryejmë një tjetër në çdo kohë që duam”, tha Trump para gazetarëve në Shtëpinë e Bardhë.
Irani tha se kishte sulmuar ato që i cilësoi si asete amerikane në Bahrein, Jordani, Kuvajt dhe Irak. Teherani deklaroi se synimi i tij tashmë është largimi i forcave amerikane nga rrjeti i gjerë i bazave ushtarake që SHBA-ja ka në Lindjen e Mesme prej dekadash.
“E keqja amerikane në rajon do të përballet me përgjigje më të fuqishme, më të gjera dhe shkatërruese”, deklaroi komanda ushtarake iraniane, duke paralajmëruar pasoja edhe për shtetet që bashkëpunojnë me ushtrinë amerikane.
Irani pretendoi se kishte vrarë pjesëtarë të forcave amerikane në Jordani dhe në një bazë në veri të Irakut. Megjithatë, zyrtarë amerikanë i thanë Reuters se, sipas vlerësimeve fillestare, nuk kishte viktima amerikane, raporton Reuters.
Në Kuvajt, Irani tha se kishte kryer sulm me raketa dhe dronë ndaj bazës ajrore amerikane Ali Al Salem dhe një kompleksi banimi të përdorur nga një komandant amerikan. Shërbimi zjarrfikës i Kuvajtit konfirmoi se kishte shuar një zjarr në një kompleks banimi që ishte goditur nga një dron.
Katari, ku ndodhet baza më e madhe amerikane në Gjirin Persik, tha se Irani mban përgjegjësi për sulmet dhe pasojat e tyre. Ndërkohë, Bahreini, ku ndodhet selia rajonale e Marinës amerikane, deklaroi se dronët iranianë ishin kapur dhe shkatërruar.
Irani tha gjithashtu se dy cisterna nafte ishin goditur nga mina teksa po kalonin nëpër Ngushticën e Hormuzit, nën drejtimin e personelit amerikan.
Uashingtoni ka deklaruar se, pavarësisht sulmeve iraniane, po vazhdon të udhëheqë anijet përmes ngushticës. Sekretari amerikan i Energjisë, Chris Wright, tha se vetëm të hënën përmes saj kishin kaluar më shumë se 17 milionë fuçi naftë.
The post Sulmet SHBA-Iran rrisin frikën për një luftë të re në Lindjen e Mesme appeared first on Gazeta Express.
