Një bombë e vendosur në një mjet të vogël transporti ka shpërthyer në një treg në Lakki Marwat, në veriperëndim të Pakistanit, duke vrarë të paktën 9 persona dhe plagosur mbi 20 të tjerë. Sipas policisë, mes viktimave janë edhe dy policë të trafikut dhe një grua, ndërsa shumica e të lënduarve ishin kalimtarë, shkruan Euronews.
Autoritetet thanë se shënjestra dyshohet të kenë qenë policët e trafikut, por deri tani asnjë grup nuk e ka marrë përgjegjësinë për sulmin. Megjithatë, dyshimet zakonisht bien mbi Tehrik-e-Taliban Pakistan (TTP), i cili ka rritur aktivitetin e tij në vitet e fundit në rajonin kufitar me Afganistanin.
Kryeministri Shehbaz Sharif e dënoi sulmin dhe urdhëroi hetim të shpejtë, duke premtuar se përgjegjësit do të nxirren para drejtësisë.
Ngjarja vjen në një kohë kur dhuna militante në Pakistan është rritur ndjeshëm që nga rikthimi i talibanëve në pushtet në Afganistan në vitin 2021, duke rritur edhe tensionet mes dy vendeve.
The post Të paktën nëntë të vrarë nga shpërthimi i një bombe në një treg në Pakistan appeared first on Gazeta Express.
