Kryetari i Obiliqit, Halil Thaçi, refuzoi javën e kaluar të marrë pjesë në takimin e komunave, për ndërmarrjen regjionale “Pastrimi”.
Sikurse Thaçi, vepruan edhe dy kryetarët e tjerë që vijnë nga Lëvizja Vetëvendosje, Shpejtim Bulliqi i Podujevës, dhe Valon Prebreza i Fushë Kosovës.
Për përgjigjen negative ndaj ftesës së të parit të kryeqytetit, Përparim Rama, Thaçi ka një përgjigje.
“Çështja e këtij takimi ka qenë më shumë çështje politike sesa çështje praktike, apo çështje që duhet t’i jepet kahje kësaj problematike. Ne, si Komunë e Obiliqit, kemi rreth 3 për qind të KRM “Pastrimi”-t, prandaj absolutisht, në asnjë formë, nuk i ikim përgjegjësisë që e kemi me KRM “Pastrimi”-n, mirëpo KRM “Pastrimi” i ka borxh Komunës së Obiliqit”, deklaroi Thaqi.
Thaçi thotë se që prej janarit të këtij viti, kërkoi të gjindej një zgjidhje për “Pastrimin”, mirëpo pretendon se askush nuk e dëgjoi.
“Kam has në vesh të shurdhër…”
Madje, për gjendjen aktuale të “Pastrimit”, ai thotë se i di edhe fajtorët.
“Dështimet që i ka KRM “Pastrimi” u faturohen dy individëve, Përparim Ramës dhe Imri Ahmetit, askujt tjetër. Ata janë kryetarë kaherë, por dështimi i KRM “Pastrimi”-t nuk më drejtohet mua, se kemi vetëm 3 për qind, njëjtë siç e ka edhe Komuna e Fushë Kosovës” , theksoi Thaçi.
Për menaxhimin e mbeturinave në komunën e Obiliqit, Thaçi tregon se e kanë angazhuar ndërmarrjen lokale të qytetit.
Javën e kaluar, kryetari i Prishtinës, Përparim Rama, ftoi në takim të gjithë kryetarët e komunave të cilat marrin shërbime nga kompania “Pastrimi”.
Mirëpo, pozitivisht ftesës iu përgjigjën vetëm Drenasi dhe Lipjani.
Për kompaninë “Pastrimi”, Rama tha se duhet të gjindet një zgjidhje nga të gjitha komunat që marrin shërbime, pasi përgjegjësia nuk mund të bie vetëm mbi kryeqytetin.
Me Ramën u pajtuan dy kryetarët, Ramiz Lladrovci e Imri Ahmeti, të cilët kërkuan nga tre kryetarët e tjerë, Halil Thaçi, Valon Prebreza e Shpejtim Bulliqi, bashkëpunim në gjetjen e një zgjidhje.
