Shtetet e Bashkuara dhe Irani kanë shkëmbyer sulme për herë të parë pas disa javësh, pasi forcat amerikane goditën dy lëshues raketash në ishullin Larak, në ngushticën e Hormuzit.
Sipas Korpusi i Gardës Revolucionare Islamike (IRGC), nga sulmet amerikane u vranë dy persona dhe u plagosën dy të tjerë. IRGC-ja ka paralajmëruar se do të ketë “përgjigje dhe ndëshkim”.
Komanda Qendrore e SHBA-së (CENTCOM) tha se kishte ndërmarrë “veprim të kufizuar dhe të saktë” kundër forcave që po vendosnin mina dhe që, sipas saj, përbënin “kërcënim të menjëhershëm” në ngushticën e Hormuzit.
Në kundërpërgjigje, Irani tha se kishte sulmuar baza ushtarake amerikane në Jordani. Ushtria jordaneze njoftoi se kishte interceptuar tetë raketa gjatë orëve të para të mëngjesit të së hënës.
Ndërkohë, televizioni shtetëror iranian raportoi se ushtria iraniane kishte shënjestruar me dronë një bazë ajrore në Emiratet e Bashkuara Arabe.
Ministria e Mbrojtjes e Emirateve të Bashkuara Arabe i mohoi këto raportime, duke i cilësuar si “të pabazuara”. Megjithatë, ministria konfirmoi se një dron ishte rrëzuar.
Sulmi amerikan në ishullin Larak është sulmi i parë i njohur ndaj Iranit që nga fundi i korrikut, kur presidenti amerikan Donald Trump pezulloi një fushatë të ripërtërirë ushtarake kundër Iranit.
Ishulli Larak ndodhet pranë portit kryesor iranian të Bandar Abbasit dhe në hyrje të ngushticës së Hormuzit, një prej rrugëve më të rëndësishme detare për transportin global të naftës dhe gazit të lëngshëm natyror. Para fillimit të luftës, nëpër këtë ngushticë kalonte rreth 20 për qind e naftës dhe gazit natyror të lëngshëm në botë.
Irani aktualisht kërkon që anijet-cisternë që kalojnë nëpër këtë zonë të ndalen pranë ishullit për kontrolle dhe, sipas raportimeve, po u kërkon disa anijeve pagesa deri në 2 milionë dollarë për kalimin.
Agjencia iraniane e lajmeve Tasnim, e afërt me IRGC-në, raportoi fillimisht se sulmi në Larak ishte kryer me dronë, raporton BBC.
Disa orë më vonë, mediat iraniane publikuan një deklaratë të IRGC-së, sipas së cilës forcat iraniane kishin sulmuar me raketa balistike bazat amerikane King Hussein dhe al-Azraq në Jordani, në përgjigje të sulmit amerikan në ishullin Larak.
Ministria e Jashtme iraniane e dënoi “fuqishëm agresionin ushtarak amerikan” ndaj Larakut dhe i cilësoi sulmet ndaj bazave në Jordani si “mbrojtje legjitime”.
Presidenti iranian, Masoud Pezeshkian, deklaroi se Irani nuk kërkon luftë, por do t’u përgjigjet sulmeve.
“Ne nuk po kërkojmë luftë, por do t’u japim një përgjigje vendimtare agresorëve”, tha Pezeshkian, sipas AFP-së.
Pas sulmit amerikan, presidenti Donald Trump publikoi në rrjetin e tij Truth Social disa video të krijuara me inteligjencë artificiale, që shfaqnin shpërthime në infrastrukturën e naftës.
Njëra prej videove u publikua me përshkrimin “Ishulli Kharg duke u hedhur në erë”, duke iu referuar një terminali të rëndësishëm iranian të naftës në brigjet e Iranit. Trump ka kërcënuar më herët se mund ta godasë këtë objekt.
Javën e kaluar, Trump deklaroi se të gjitha minat e vendosura nga Irani në ngushticën e Hormuzit, si pjesë e përpjekjeve për bllokimin e rrugës detare, ishin çaktivizuar ose hequr.
Ai paralajmëroi gjithashtu se çdo anije apo varkë që do të vendoste mina të reja në ngushticë do të shkatërrohej.
