Pesë vatra zjarri vijojnë të jenë aktive në vend, ndërsa dy të tjera po mbahen nën mbikëqyrje. Sipas Ministrisë së Mbrojtjes, deri në orën 20:00 të së shtunës janë raportuar gjithsej 16 vatra. Për përballimin e situatës janë angazhuar 228 forca operacionale, 10 automjete zjarrfikëse, katër helikopterë dhe 75 efektivë të Forcave të Armatosura.
Në Qafë-Priskë të Dajtit, zjarri është riaktivizuar në disa zona. Në operacion janë përfshirë forca zjarrfikëse, efektivë të FA dhe dy helikopterë. Situata mbetet problematike edhe në Vajkal të Bulqizës, ku flakët kanë përfshirë një sipërfaqe të gjerë me shkurre dhe dëllinja. Një tjetër vatër aktive ndodhet në Sllatinë të Dibrës, por sipas autoriteteve nuk rrezikohen zonat e banuara.
Vatrat në Qafë të Helmës, malin e Dardhës dhe malin e Qukësit po monitorohen, ndërsa situata në Kroin e Madh të Krujës është drejt normalizimit. Zjarret në Komsi të Matit dhe Delisuf të Vlorës janë shuar plotësisht.
The post Situata me zjarret në Shqipëri, pesë vatra mbeten aktive appeared first on Gazeta Express.
