Ali Ahmeti, ka rrëfyer për disa prej momenteve më të rëndësishme të organizimit të lëvizjes shqiptare, raportet mes LPK-së dhe LDK-së, kontaktet me Ibrahim Rugovën e Adem Jasharin, si dhe procesin e unifikimit të njësive të rezistencës nën emrin Ushtria Çlirimtare e Kosovës.
Ahmeti tha se gjatë viteve të veprimtarisë së tij kishte pasur kontakte me shumë prej figurave të rëndësishme të lëvizjes, ndërsa tregoi se për një periudhë kishte jetuar në familjen e Sabri Novosellës.
“Unë kam banuar në familjen e Sabri Novosellës. Si student, prej fillimit deri në arratisje, kam banuar te vëllai i Sabri Novosellës, Adnani. Familje patriotësh, familje e rreshtuar historikisht në anën e duhur të kombit”, tha Ahmeti në Dukagjini
Megjithatë, ai sqaroi se me Sabri Novosellën nuk kishte pasur kontakte të drejtpërdrejta organizative.
Duke folur për raportet mes LPK-së dhe LDK-së, Ahmeti tha se, pavarësisht dallimeve në mënyrën e veprimit, nuk kishte pasur hasmëri në nivelet drejtuese.
“Ne kemi komunikuar me të gjithë ata që drejtonin Lidhjen Demokratike të Kosovës dhe ka konkluza në organet drejtuese të Lëvizjes Popullore të Kosovës që këta nuk janë armiq. Këta janë vëllezërit tanë dhe duhet të gjejmë urat e komunikimit dhe të afrimit”, deklaroi ai.
Ahmeti tha se nuk kishte pasur takim personal me Ibrahim Rugovën, por se përfaqësues të LPK-së ishin takuar me të dhe e kishin informuar për zhvillimet dhe organizimin e rezistencës.
“Unë nuk kam pasur takim me Ibrahim Rugovën, por të deleguarit tanë që i kam sugjeruar të takohen me Ibrahim Rugovën kanë shkuar dhe janë takuar”, tha ai.
Sipas Ahmetit, gjatë viteve ’90 kishte pasur përpjekje për bashkërendimin e veprimeve politike dhe organizative.
“Nuk ka pasur fërkime, divergjenca në mes të lëvizjes legale dhe asaj të fshehtë. Flas në nivele të larta ku janë bërë politikat”, u shpreh ai.
Ai rrëfeu edhe një bisedë telefonike me Adem Jasharin, për të cilën tha se kishte ndodhur në fillim të viteve ’90.
“Unë kam pasur vetëm një bisedë të shkurtër me Adem Jasharin, që më paraqitet prej Tiranës. Na thotë: ‘Na keni lënë në rrugë’. I them: ‘Po, përse ju kemi lënë në rrugë?’. Duhet me na dalë zot, me na pajis, me na rregullu kështu”, tregoi Ahmeti.
Sipas tij, më pas nuk pati komunikim të drejtpërdrejtë me Jasharin, por vazhduan kontaktet me bashkëluftëtarët e tij.
Ahmeti foli më tej për mbledhjen në Arau të Zvicrës, ku, sipas tij, u mor vendimi që njësitet e ndryshme të rezistencës të vepronin nën një mekanizëm të përbashkët – Ushtrinë Çlirimtare të Kosovës. /Dukagjini
The post Ali Ahmeti rrëfen prapaskenat e organizimit të UÇK-së: Nga kontaktet me Rugovën e Jasharin te mbledhja në Arau appeared first on Gazeta Express.
