Policia ka kryer disa aksione dhe kontrolle në Tetovë dhe Gostivar, gjatë të cilave janë gjetur dhe konfiskuar armë zjarri, municion, lëndë narkotike dhe mjete të tjera, ndërsa disa persona janë privuar nga liria.
Sipas njoftimit të Ministrisë së Punëve të Brendshme, më 21 gusht, zyrtarët policorë të SPB Tetovë kanë arrestuar 41-vjeçarin S.B. nga fshati Leshok. Gjatë kontrollit të shtëpisë dhe hapësirave ndihmëse, të kryer me urdhër gjykate, janë gjetur një karabinë 7 mm me dylbi optike, një pistoletë „CZ“ 9 mm me karikatorë bosh, një pushkë ajrore 5.4 mm me dylbi, si dhe fishekë të kalibrave të ndryshëm.
Në një tjetër rast, po më 21 gusht rreth orës 20:21, policia në Gostivar ka privuar nga liria shtatë persona pas një denoncimi për prishje të rendit dhe qetësisë publike me të shtëna nga armë zjarri në fshatin Kunovë.
Bëhet fjalë për A.M. (39), D.M. (26), B.S. (37), R.R. (66), B.A. (37) dhe R.V. (72), të gjithë nga Gostivari, si dhe N.L. (65) nga Shkupi. Në vendngjarje janë gjetur gëzhoja, ndërsa gjatë kontrolleve në disa shtëpi pushimi janë konfiskuar disa armë zjarri, përfshirë karabina dhe pushkë gjuetie, një pistoletë, si dhe një sasi më e madhe municioni.
Ndërkohë, gjatë natës mes 21 dhe 22 gushtit, policia e Tetovës, në koordinim me Njësinë Speciale Antiterroriste „Tigrat“ dhe Njësitin e Qenve të Shërbimit, ka kryer kontroll në një shtëpi dhe një objekt-barakë punëtori në Tetovë, të përdorura nga P.M. (36).
Në punëtori janë gjetur tre persona – L.S. (19) dhe dy të mitur 16-vjeçarë. Te L.S. dhe njëri prej të miturve është gjetur lëndë e bardhë pluhurore, marihuanë dhe dy peshore digjitale. Në objekt janë gjetur gjithashtu kuti me lëndë të bardhë pluhurore dhe mjete financiare në valuta dhe vlera të ndryshme.
Të gjithë personat e ndaluar janë privuar nga liria, ndërsa nga MPB-ja bëjnë të ditur se pas dokumentimit të plotë të rasteve, në koordinim me prokurorin publik, do të parashtrohen kallëzimet përkatëse.
