Ukraina po shqyrton përdorimin e pjesës së ardhshme të kredisë prej 90 miliardë eurosh nga Bashkimi Evropian për blerjen e sistemeve kundër raketave balistike, ka bërë të ditur një zyrtar i Komisionit Evropian pranë diskutimeve për këtë financim.
Sipas zyrtarit, Kievi mund të përdorë fondet e ardhshme të mbrojtjes për blerjen e sistemeve të tilla, së bashku me raketa dhe dronë. Ende nuk është përcaktuar nëse Ukraina do të blejë sistemet amerikane Patriot apo sistemin franko-italian SAMP/T NG.
Porositë pritet të bëhen para muajit shtator, ndërsa furnizimet do të realizohen në kuadër të paketave të ardhshme të mbështetjes.
Ky zhvillim vjen pas një sulmi të rëndë rus në Ukrainë, ku të paktën 16 persona u vranë dhe 33 të tjerë u plagosën. Presidentja e Komisionit Evropian, Ursula von der Leyen, tha se BE-ja dhe partnerët po punojnë për të forcuar kapacitetet kundër raketave balistike të Ukrainës.
Presidenti ukrainas Volodymyr Zelenskyy ka kërkuar vazhdimisht nga SHBA-ja më shumë interceptorë Patriot, duke theksuar nevojën për mbrojtjen e qyteteve dhe infrastrukturës ukrainase gjatë dimrit.
Në të njëjtën kohë, Zelenskyy njoftoi në korrik se Ukraina do të bëhej përdoruesja e parë “në kushte luftarake” e sistemit të ri franko-italian SAMP/T NG. Kievi planifikon t’i blejë këto sisteme përmes kësteve të kredisë së BE-së për vitet 2026 dhe 2027.
Nga 90 miliardë eurot e kredisë, rreth 60 miliardë euro janë paraparë për forcimin e mbrojtjes së Ukrainës gjatë luftës, ndërsa pjesa tjetër do të përdoret për mbështetjen e buxhetit të shtetit.
Vetëm gjatë vitit 2026, rreth 28.3 miliardë euro janë planifikuar për mbështetjen e kapaciteteve të industrisë ukrainase të mbrojtjes, ku një pjesë e fondeve tashmë është paguar.
BE-ja synon që sa më shumë nga këto fonde të përdoren për blerjen e pajisjeve ushtarake të prodhuara në Evropë, përmes politikës “Made in Europe”. Prioritet kanë prodhuesit nga Ukraina, vendet e BE-së dhe hapësira EEA-EFTA.
Megjithatë, në raste të veçanta Brukseli mund të japë përjashtim për blerjen e armëve të prodhuara jashtë Evropës, siç është sistemi amerikan Patriot. Sipas raportimit, përjashtime të tilla janë dhënë më herët edhe për pajisje të tjera ushtarake, shkruan Euronews.
The post Ukraina synon të blejë sisteme kundër raketave balistike me fondet e kredisë 90 miliardë euro të BE-së appeared first on Gazeta Express.
