Një 12-vjeçare nga Karolina e Veriut, SHBA, është rrëmbyer nga xhaxhai 38-vjeçar i shoqes së saj, ndërsa më pas është gjetur e plagosur nga një grua që po udhëtonte me makinë pranë zonës.
Vajza u gjet mesditën e së dielës nga Jennifer Maxwell, një profesioniste e kujdesit shëndetësor, e cila po kthehej në shtëpi kur pa 12-vjeçaren duke dalë me vrap nga pylli.
Sipas dëshmisë së Maxwell, vajza ishte e mbuluar me gërvishtje, ishte zbathur dhe kishte plagë në këmbë dhe në duar. 12-vjeçarja i tha se ishte rrëmbyer.
Fëmija tregoi se kishte kaluar natën në shtëpinë e shoqes së saj më të mirë, e cila jeton aty pranë. Sipas saj, Daniel Francis Geer, 38 vjeç, xhaxhai i shoqes, e kishte zgjuar dhe më pas e kishte marrë me kamionin e tij drejt një zone pyjore.
Geer dyshohet se e ka detyruar vajzën të ecte me të për orë të tëra nëpër pyll. Maxwell tha se e pa 12-vjeçaren të dilte me vrap nga zona e pyllëzuar dhe të binte në një hendek, ndërsa qante.
Pasi dëgjoi dëshminë e saj, Maxwell telefonoi menjëherë policinë dhe e mori vajzën në makinën e saj. Ajo më pas i drejtoi oficerët drejt vendit ku kishte gjetur fëmijën, ndërsa kamioni i të dyshuarit ndodhej ende pranë zonës.
Pas një operacioni kërkimi që zgjati rreth shtatë orë, policia, duke përdorur dronë dhe qen gjurmues, arriti të lokalizonte dhe arrestonte 38-vjeçarin.
Daniel Francis Geer akuzohet për rrëmbim të shkallës së parë dhe sulm të rënduar.
Ndërkohë, 12-vjeçarja u dërgua për të marrë ndihmë mjekësore. Maxwell, e cila u përfshi në një aksident automobilistik menjëherë pas shpëtimit të vajzës, tha se e takoi sërish atë në spital.
Fqinjët thanë për mediat se Geer nuk ishte shumë i njohur në komunitet dhe se ai punonte nga shtëpia. Sipas tyre, 12-vjeçarja kishte shkuar shpesh në banesën e tij për të kaluar kohë me mbesën e tij.
Hetimet për ngjarjen vijojnë, ndërsa autoritetet po përpiqen të zbardhin të gjitha rrethanat e rrëmbimit.
The post SHBA: 12-vjeçarja rrëmbehet nga xhaxhai i shoqes dhe dërgohet në pyll, shpëton mrekullisht appeared first on Gazeta Express.
