Disa nga ilaçet më të përshkruara, përfshirë ato që përdoren për trajtimin e depresionit, ADHD-së dhe tensionit të lartë të gjakut, mund ta rrisin rrezikun e dehidratimit dhe problemeve të tjera shëndetësore të lidhura me të nxehtin, shkruan BBC.
Këtë vit, në kulmin e valës së të nxehtit që goditi Europën në qershor, Ileana Okumus nuk arrinte ta kuptonte pse po e përballonte shumë më keq se njerëzit e tjerë.
“Sapo dilja nga apartamenti, fytyra fillonte të më djersinte”, thotë ajo. Duke jetuar në një apartament në katin e fundit në Bruksel, pa ajër të kondicionuar, 28-vjeçarja kërkonte lehtësim kudo që mund ta gjente – në zyrë, në kafenetë lokale. Por nuk mjaftonte.
“Duhej të prisja gjysmë ore, një orë, para se të ftohesha”, thotë ajo. “Ishte një ditë e veçantë kur temperatura brenda apartamentit arriti në 34°C. Mendoj se fjeta rreth 18 orë”. E kishte të vështirë të zgjohej dhe shqetësohej se mos i kishte rënë tensioni i gjakut.
Intensiteti i valës së të nxehtit nuk ishte diçka e re për Okumus, e cila kishte përjetuar vera me temperatura 40°C në vende të tjera të botës. Megjithatë, ishte hera e parë që i nxehti e kishte goditur kaq rëndë. Vetëm pasi pa postime në rrjetet sociale nga njerëz me simptoma të ngjashme, ajo e lidhi të nxehtin me ilaçet që kishte filluar t’i merrte dy vjet më parë për depresion dhe ankth.
Ndërsa valët e të nxehtit bëhen më të shpeshta dhe më të rënda si pasojë e ndryshimeve klimatike, mjekët dhe organizatat shëndetësore po paralajmërojnë se disa nga ilaçet më të përdorura – përfshirë ilaçet psikiatrike, ato për tensionin e gjakut dhe ilaçet e zemrës – mund të ndërhyjnë në aftësinë e trupit për ta rregulluar temperaturën dhe po i vënë njerëzit në rrezik të sëmundjeve të lidhura me të nxehtin.
The post BBC: Ilaçet që mund ta bëjnë më të vështirë përballimin e të nxehtit appeared first on Gazeta Express.
