Sekretari i Përgjithshëm i Aleancës, Avni Arifi, ka reaguar pas publikimit të kontratës për shitjen e thëngjillit të Kosovës te Maqedonia e Veriut, duke e cilësuar qasjen e qeverisë në detyrë si “ekonomi koloniale me propagandë populiste”.
Arifi ka ngritur shqetësimin për mënyrën se si po menaxhohet pasuria energjetike e Kosovës, duke argumentuar se Kosova po e shet thëngjillin si lëndë të parë, ndërsa më pas rrymën e prodhuar me këtë thëngjill e blen si produkt final.
“Qe qysh funksionon ekonomia e Kurtistanit:
Kosova i shet thëngjill Maqedonisë si lëndë të parë, në vlerë prej 73 milionë eurosh. Me këtë thëngjill, Maqedonia prodhon 800 mijë MWh rrymë dhe, siç thonë ata, EMV-ja fiton 171 milionë euro bruto.
Pastaj, këto 73 milionë euro, bashkë me të hyrat nga rritja e TVSH-së për shkak të rritjes së çmimit të naftës, i ndan ‘te populli’ nga 100 euro para zgjedhjeve të dhjetorit.
Në tri vitet e ardhshme, Kosova e blen rrymën nga Maqedonia, e cila e ka prodhuar me thëngjillin e Kosovës.
Pra, t’i jep 100 euro nga thëngjilli i shitur në Maqedoni, e pastaj t’i merr shumëfish më shumë për ta paguar rrymën e blerë nga Maqedonia, të prodhuar me thëngjillin e Kosovës”, ka shkruar Arifi.
Sipas tij, kjo nuk përbën politikë zhvillimore, por një model ku Kosova eksporton pasurinë e saj si lëndë të parë dhe më pas importon produktin final me vlerë shumë më të madhe.
“E shet pasurinë si lëndë të parë, e importon si produkt final dhe diferencën ta paraqet si ndihmë sociale. Në fakt, është katastrofë sociale.
Kjo nuk është logjikë zhvillimore. Kjo është ekonomi koloniale me propagandë populiste.
Po ia nin fort. Votat jau merr shqiptarëve”, ka përfunduar Arifi.
The post “Qe qysh funksionon ekonomia e tij”: Arifi kritikon Kurtin për marrëveshjen e thëngjillit me Maqedoninë e Veriut appeared first on Gazeta Express.
