Ushtruesja e detyrës së presidentes së Kosovës, Albulena Haxhiu, ka thënë se pas takimit me liderët e 11 subjekteve politike është diskutuar mundësia për tejkalimin e ngërçit institucional dhe arritjen e një marrëveshjeje për zgjedhjen e presidentit.
Haxhiu tha se qëllimi i takimit ishte që partitë të gjejnë një rrugë të përbashkët përpara, duke paralajmëruar se konstituimi i Kuvendit pa një marrëveshje për presidentin mund të çojë në përsëritjen e krizave të mëparshme.
“Sapo përfundova takimin me liderët e subjekteve politike të cilët iu përgjigjen pozitivisht ftesës sime për takim, ishin 11 liderë të partive politike të cilët përfaqësohen edhe në Kuvendin e Kosovës, qëllimi i këtij takimi ishte që në rrethanat në të cilat jemi të shohim që a kemi ndonjë rrugë që të ecim bashkë përpara në mënyrë që të shmangim ngërçin institucional, në qoftëse hymë në konstituimin e Kuvendit pa një marrëveshje për presidentin mund të përsëritet kriza e vitit të kaluar dhe po ashtu e këtij viti. E dimë ku na dërgon mungesa e dialogut apo refuzimi i takimeve”, deklaroi Haxhiu në konferencë për media.
Ajo theksoi se nuk pret që partitë politike të pajtohen për gjithçka, por kërkoi që të jenë të gatshme të diskutojnë për funksionimin e shtetit.
Haxhiu propozoi që diskutimet të nisin konkretisht edhe për emrat e mundshëm për president, duke kërkuar një kandidat konsensual dhe që nuk i përket një partie politike.
Sipas Haxhiut, gjatë takimit është përmendur edhe qëndrimi i LVV-së se presidenti duhet të jetë nga kjo parti.
Ajo paralajmëroi se zgjedhjet e reja nuk garantojnë domosdoshmërish zgjidhjen e krizës politike.
“Duhet të kontribuojmë maksimalisht për çështjen e marrëveshjes për president dhe patjetër duhet të shmangen zgjedhjet e parakohshme, unë nuk pres që partitë politike të pajtohen për gjithçka, pres që të jenë të gatshme të flasin për funksionimin e shtetit. Nëse nuk mund të merremi vesh sot, nuk kemi asnjë garanci që një palë e zgjedhjeve të reja do të na bëjnë që të merremi vesh nesër. Le të fillojmë të flasim me emra të përveçshëm për një kandidat konsensual, për një kandidat që nuk është në njërën parti politike. Kryetari i VV-së e përmendi që duan që presidenti të jetë nga partia e VV-së”, u shpreh ajo./teve1.info/
