Të paktën 30 fëmijë, shumica e tyre britanikë, dyshohet se janë konceptuar përmes trajtimeve të fertilizimit in vitro në Qipron e Veriut, duke përdorur spermë ose vezë nga donatorë të gabuar.
Sipas një hetimi të BBC-së, prindërit e këtyre fëmijëve dyshojnë se klinikat e fertilitetit nuk kanë përdorur donatorët që ata kishin përzgjedhur.
Shifra prej të paktën 30 rastesh është një nga gjetjet e reja të hetimit, i cili në fillim të këtij viti kishte zbuluar shtatë raste të ngjashme.
Prindërit deklarojnë se kishin përzgjedhur me kujdes donatorët anonimë, duke u bazuar në të dhëna si historiku mjekësor, pamja fizike, personaliteti, niveli arsimor dhe interesat e tyre.
Megjithatë, pas lindjes së fëmijëve, ata kanë ngritur dyshime se sperma ose vezët e donatorëve të përzgjedhur nuk janë përdorur gjatë procedurave të fertilizimit.
Sipas BBC-së, gjysma e 30 fëmijëve të identifikuar dyshohet se kanë lindur pas procedurave të kryera në një klinikë të vetme, Dogus IVF Centre.
“Është absolutisht skandaloze”, tha një prej nënave, e identifikuar si Rachel, e cila së fundmi mësoi se klinika kishte përdorur spermën e një donatori tjetër nga ai që ajo kishte zgjedhur.
Hetimi përmend gjithashtu tre persona të përfshirë në kujdesin e shumë prej pacientëve në Dogus: mjekët Firdevs Uguz Tip dhe Sevket Alpturk, si dhe koordinatoren e pacientëve Julie Hodson.
Prindërit dyshojnë se këta persona mund t’i kenë keqinformuar ose mashtruar lidhur me procedurat dhe donatorët e përdorur. Firdevs Uguz Tip i ka mohuar çdo shkelje, ndërsa Alpturk dhe Hodson nuk u janë përgjigjur pyetjeve të BBC-së.
Ndërkohë, BBC ka mësuar se banka më e madhe e spermës në botë, Cryos International, e ka vendosur Dogus IVF Centre në listën e zezë që prej vitit 2016.
The post Skandal në Qipron e Veriut: Së paku 30 fëmijë dyshohet se janë konceptuar në një klinikë IVF me spermë ose vezë nga donatorë të gabuar appeared first on Gazeta Express.
