Presidenti i SHBA-së, Donald Trump, ka deklaruar se Shtetet e Bashkuara do të “reduktojnë ndjeshëm” stërvitjet e përbashkëta ushtarake me Korenë e Jugut, duke e lidhur këtë vendim me marrëdhëniet e tij me liderin e Koresë së Veriut, Kim Jong Un.
Trump tha në një postim në rrjetin social Truth Social se stërvitjet ushtarake janë të kushtueshme dhe se një pjesë e madhe e kostove mbulohet nga SHBA-ja. Sipas tij, ato gjithashtu dërgojnë një “sinjal të papërshtatshëm dhe armiqësor”.
“Stërvitjet nuk janë vetëm të kushtueshme, me pjesën më të madhe të këtyre kostove të paguara nga Shtetet e Bashkuara të Amerikës, por gjithashtu dërgojnë një sinjal që është krejtësisht i papërshtatshëm dhe armiqësor”, shkroi Trump.
Ai përmendi edhe refuzimin e Koresë së Jugut për t’iu bashkuar SHBA-së në përpjekjet për “denuklearizimin” e Iranit.
“Meqë ra fjala, së fundmi e pyeta presidentin e Koresë së Jugut nëse do të dëshironin të bashkoheshin me ne në denuklearizimin e Republikës Islamike të Iranit, dhe ata thanë: ‘Jo, faleminderit!’”, shkroi Trump.
Megjithatë, Koreja e Jugut ka bërë të ditur se stërvitjet e përbashkëta ushtarake me SHBA-në do të zhvillohen sipas planit.
Trump tha se ishte tashmë “tepër vonë për t’i anuluar” stërvitjet, pasi ato nisnin të hënën dhe ishin planifikuar prej kohësh.
Deklarata e presidentit amerikan erdhi më pak se 24 orë pasi ai publikoi një fotografi të vjetër me Kim Jong Un, të realizuar në vitin 2019, duke i cilësuar ata si “miq të mëdhenj”, pavarësisht se në fotografi, sipas tij, kishin një “pamje jo miqësore”.
Ekspertët kanë paralajmëruar se reduktimi i stërvitjeve mund të ketë pasoja të mëdha për aleancën SHBA–Kore e Jugut, ndërsa përfitimet diplomatike ndaj Koresë së Veriut mund të jenë të kufizuara.
Leif-Eric Easley, profesor në Universitetin Ewha në Seul, tha se stërvitjet e përbashkëta janë thelbësore që forcat e të dyja vendeve të jenë të përgatitura dhe të afta për të reaguar në rast konflikti.
Sipas tij, reduktimi i tyre mund të dëmtojë koordinimin mes ushtrive, të ngadalësojë procesin që Koreja e Jugut të marrë më shumë përgjegjësi për mbrojtjen e saj dhe të dobësojë parandalimin ndaj konflikteve të mundshme në Azi.
SHBA-ja dhe Koreja e Jugut javën e kaluar njoftuan zyrtarisht për stërvitjen vjetore “Ulchi Freedom Shield”. Aktiviteti do të zgjasë 11 ditë dhe do të jetë i ngjashëm në përmasa me stërvitjet e viteve të mëparshme, me pjesëmarrjen e rreth 18 mijë ushtarëve koreano-jugorë.
Gjatë konferencës për media, zyrtarët ushtarakë amerikanë dhe koreano-jugorë përmendën gjithashtu dislokimin e trupave të Koresë së Veriut në Rusi për të mbështetur luftën kundër Ukrainës. Ushtria amerikane tha se përgatitjet dhe stërvitjet marrin parasysh edhe këtë kërcënim.
Rreth 28 mijë e 500 trupa amerikane janë të dislokuara aktualisht në Korenë e Jugut.
Koreja e Veriut ka kundërshtuar vazhdimisht stërvitjet ushtarake SHBA–Kore e Jugut. Ministria e Jashtme e vendit i cilësoi ato të premten si “provë për një luftë agresive”.
Stërvitjet e reja zhvillohen vetëm disa ditë pasi SHBA-ja, Koreja e Jugut dhe Japonia zbuluan një tjetër testim raketor nga Koreja e Veriut.
Pyongyangu ka përshpejtuar zhvillimin e programeve të tij bërthamore dhe raketore që nga dështimi i diplomacisë së nivelit të lartë mes Kim Jong Unit dhe Trumpit në vitin 2019.
Trump u bë presidenti i parë në detyrë i SHBA-së që shkeli në territorin e Koresë së Veriut, gjatë takimit me Kim Jong Un në vitin 2019.
