Liqeni i Degës në Belsh, monument natyre i kategorisë së parë, mbetet një nga liqenet më piktoreske të Dumresë që tërheq vëmendjen e turistëve vendas dhe atyre të huaj.
Kryeministri Edi Rama ndau në rrjetet sociale pamje nga ky liqen, duke sjellë në vëmendje bukuritë natyrore të zonës së Dumresë.
Përmes pamjeve të publikuara, Rama përcolli peizazhin e liqenit, të rrethuar nga gjelbërimi dhe natyra karakteristike.
Tashmë Belshi i rilindur tërësisht është një destinacion i rëndësishëm turistik në qarkun e Elbasanit.
Kjo mbetet një zonë me një peizazh natyror që të bën për vete në të katër stinët e vitit, por më interesante është pranvera dhe vjeshta, ku bimësia spikat me ngjyrat e saj të theksuara.
Gjithë krahina numëron rreth 84 liqene, midis tyre ka dhe të vegjël fare, por të gjithë janë të bukur dhe kanë karakteristikat e tyre.
Liqenet e Dumresë kanë një florë befasuese sidomos në pranverë. Disa numërohen me emra për bukurinë e tyre si, ai i Seferanit, Merhojes, Cestijes, Degës, me një florë të pasur si, zambaku i bardhë, zambaku i verdhë, karakteristikë për ujërat e këtyre liqeneve që tërheqin vëmendjen e vizitorëve. /Telegrafi/
