Ministri i Jashtëm rus, Sergej Lavrov, ka dalë në mbrojtje të presidentit serb Aleksandar Vuçiq, duke akuzuar Bashkimin Evropian për presion dhe, siç është shprehur ai, shantazh ndaj Serbisë në rrugën e saj drejt integrimit evropian.
Në një intervistë për mediat ruse, Lavrov tha se Vuçiqi ‘është një politikan me shumë përvojë dhe se Serbia po përballet prej vitesh me presion të madh nga BE-ja’.
Sipas Lavrovit, Brukseli po i vendos Serbisë dy kushte kryesore për përshpejtimin e procesit të integrimit: njohjen e pavarësisë së Kosovës dhe harmonizimin me të gjitha masat dhe vendimet e BE-së ndaj Rusisë.
“BE-ja po e maltreton dhe po e shantazhon” Vuçiqin, ka deklaruar Lavrov, duke shtuar se presidenti serb po e përballon me guxim këtë presion.
Kreu i diplomacisë ruse theksoi gjithashtu mbështetjen e Moskës ndaj Beogradit, duke përmendur furnizimin e Serbisë me gaz me çmime të favorshme. Ai tha se Rusia nuk i kërkon Serbisë asgjë në këmbim, përveç që të mos marrë pjesë në armatosjen e Ukrainës.
Lavrov e lidhi edhe vizitën e presidentit ukrainas Volodymyr Zelensky në Beograd me presionin që, sipas tij, po ushtrohet ndaj Vuçiqit nga Bashkimi Evropian. Sipas tij, vendimi i Vuçiqit për ta pritur Zelenskyn mund të jetë përpjekje për ta zbutur këtë presion.
Ministri rus shkoi edhe më tej në akuzat ndaj BE-së, duke e cilësuar presionin ndaj Serbisë si “të paturpshëm” dhe “vulgar”, ndërsa deklaroi se mënyra se si vepron BE-ja i ngjan asaj që ai e quajti “Rajhu i Katërt”.
Lavrov komentoi edhe një pyetje të gazetarit gjerman Michael Martens drejtuar Zelenskyt gjatë konferencës në Beograd, lidhur me vrasjen e rusëve. Ai tha se kishte vërejtur reagimin e Vuçiqit, i cili, sipas tij, ishte befasuar nga pyetja.
Në fund, Lavrov tha se Rusia do të dëshironte që Serbia, duke pasur parasysh kontributin e saj historik në luftën kundër nazizmit, të reagonte ndaj çështjeve të tilla.
The post Lavrov mbron Vuçiqin dhe sulmon BE-në: Po e shantazhojnë Serbinë për Kosovën appeared first on Gazeta Express.
