Ministri i Jashtëm i Iranit, Abbas Araghchi, i paralajmëroi Washingtonit që të “bëjë kujdes” të enjten, pasi presidenti Donald Trump këmbënguli se SHBA-ja ka kontroll të plotë mbi Ngushticën e Hormuzit.
“Më keq se lajmet e rreme janë informacionet e rreme të inteligjencës”, shkroi Araghchi në X. “SHBA-ja ka bërë prej kohësh llogaritje të gabuara për shkak të dështimeve të inteligjencës. Shembull konkret: lufta kundër Iranit. Tani, një llogaritje edhe më e madhe e gabuar për Ngushticën e Hormuzit”, tha ai, shkruan CNN.
Të mërkurën, Trump deklaroi: “SHBA-ja ka kontroll total mbi Ngushticën e Hormuzit.” “MENDOJ SE DO TA MBAJMË! Bllokada jonë detare po quhet, nga të gjithë, ‘NJË MUR ÇELIKU’”, shkroi ai në Truth Social. “Nuk ka asgjë që mund të bëjë Irani për këtë”.
“Ata nuk kanë marinë ushtarake, nuk kanë forcë ajrore, ushtarët e tyre të mbetur nuk paguhen, Korpusi i Gardës Revolucionare Islamike është shkatërruar dhe po ikën”, shtoi Trump.
Edhe zyrtarë të tjerë të lartë në Teheran kanë ashpërsuar qëndrimin, ndërsa Hossein Taeb – një figurë e vijës së ashpër në milici dhe aleat i afërt i Udhëheqësit Suprem Mojtaba Khamenei – tha se “SHBA-ja nisi një luftë tjetër në Ngushticën e Hormuzit, por ka dështuar”, pavarësisht “pikëpamjes së Washingtonit se Iranit i mungonin forcat detare dhe ajrore efektive”, sipas agjencisë gjysmëzyrtare iraniane Fars News.
Teherani dhe Washingtoni janë përpjekur ta përdorin Ngushticën e Hormuzit si mjet presioni në negociatat e dështuara të paqes – ndërsa të dyja palët kanë pretenduar vazhdimisht sovranitet mbi këtë rrugë ujore. Ky ngërç diplomatik e ka bllokuar praktikisht transportin detar në ngushticë, përmes së cilës kalonte rreth një e pesta e furnizimit global me naftë para luftës.
The post Ministri i Jashtëm iranian kritikon “lajmet e rreme” pasi Trump pretendon se SHBA e kontrollon Hormuzin appeared first on Gazeta Express.
