Prokurorët izraelitë kanë ngritur akuzë ndaj një kolonisti për “vrasje nga pakujdesia” lidhur me vrasjen e aktivistit të njohur palestinez Awdah al-Hathaleen.
Veprime të tilla ligjore ndaj kolonëve janë të rralla. Autoritetet e kanë identifikuar të akuzuarin si Yinon Levi.
Organizata izraelite për të drejtat e njeriut B’Tselem tha se akuzat ndaj Levit shënojnë herën e parë që nga 7 tetori 2023 që një izraelit është akuzuar zyrtarisht për vdekjen e një palestinezi në Bregun Perëndimor të pushtuar.
Gjatë kësaj periudhe, organizata tha se kolonët dhe ushtarët kanë vrarë të paktën 1,100 palestinezë në këtë territor.
Hathaleen, i cili ishte aktiv në kundërshtimin e dhunës së kolonëve, ishte përfshirë në filmin fitues të çmimit Oscar 2025, “No Other Land”.
Ai u vra në korrik 2025, pasi një kolon që kishte hyrë në fshatin e tij, Umm al-Khair, në zonën Masafer Yatta të Bregut Perëndimor, hapi zjarr.
Aktivisti, i cili ndodhej disa metra larg sulmuesit, po filmonte gjithashtu dhe duket se e ka kapur momentin e të shtënave.
Dhjetëra persona protestuan kundër vrasjes së tij dhe kundër faktit që autoritetet izraelite i mbajtën mbetjet e tij mortore për disa ditë para se t’ua dorëzonin familjarëve.
