Tirana e siguroi mbetjen në Kategorinë Superiore këtë sezon, pavarësisht shumë problemeve që kishin në fillimin e sezonit 2025-26.
Mbrojtësi kosovar, Diar Halili u huazua nga Prishtina tek Tirana në janar dhe luajti perfekt për ekipin shqiptar në sezonin pranveror, duke qenë shtylla e mbrojtjes dhe një lojtar kyç në arritjen e këtij suksesi.
Halili theksoi se ky ka qenë një sezon shumë i mirë për të dhe e ka shijuar shumë.
“Ky ishte ndoshta një nga sezonet që më ka shijuar më së shumti deri tani. Erdha nga Prishtina pas një periudhe mjaft të vështirë personale dhe, falë Zotit, arrita sadopak ta ndihmoj Tiranën në këtë mision jo të lehtë, falë besimit dhe përkrahjes së vazhdueshme nga stafi”, tha fillimisht Diar Halili për ‘GazetaBlic Sport’.
Qendër mbrojtësi 22 vjeçar pranoi se presioni tek ekipi i Tiranës ishte i madh, shkaku i pozicionit, por edhe mbështetja nga tifozët është e fuqishme.
“Është e vërtetë që presioni ishte shumë i madh, sepse KF Tirana nuk e meriton atë pozitë në të cilën ndodhej në janar. Por situatat e vështira janë për karaktere të forta dhe ne e dëshmuam si grup se kemi kualitet dhe se, të bashkuar, ia dolëm. Mbështetja më e madhe për ne ishin tifozët, stafi dhe drejtuesit e klubit, të cilët na qëndruan pranë në çdo moment”, vazhdoi ai.
Halili në fund tha se do të vendosë bashkë me klubin për të ardhmen e tij.
“Tani jemi më shumë të çliruar sesa të lumtur, sepse Tirana gjithmonë ka ambicie më të mëdha se kaq. Për momentin do ta shijojmë këtë sfidë që kaluam së bashku, pastaj do të ulemi dhe do të bisedojmë për të ardhmen time”, përfundoi ai.
/GazetaBlic Sport/
