Revista prestigjioze amerikane “Harper’s Bazaar” i ka kushtuar një artikull të veçantë Dua Lipës dhe Sunny Hill Festival, duke e vendosur Kosovën në qendër të vëmendjes së lexuesve ndërkombëtarë
Në artikullin e publikuar më 4 gusht, revista shkruan se Dua Lipa solli industrinë botërore të muzikës në Prishtinë për festivalin disaditor, ndërsa e cilëson këngëtaren shqiptare si “mbretëresha e Sunny Hill Festival”.
“Harper’s Bazaar” ndalet veçanërisht te paraqitjet e saj gjatë festivalit, duke vlerësuar stilin dhe zgjedhjet e veshjeve. Sipas revistës, në natën e parë Dua Lipa u shfaq me një minifustan metalik të markës Rabanne, të punuar me rrjetë metalike dhe të zbukuruar me elemente lulesh tredimensionale, të cilin e kombinoi me çizme të zeza prej lëkure.
Në ditën pasuese, ajo zgjodhi një stil më bohem, duke veshur një kostum të bardhë prej dantelle të markës Chloé, me supe të zbuluara dhe një rrip të zi, ndërsa në mbrëmje i shtoi një xhaketë të kuqe dhe festoi së bashku me familjen.
Revista i kushton vëmendje edhe lidhjes së ngushtë të Dua Lipës me Kosovën, duke kujtuar se Sunny Hill Festival u themelua në vitin 2018 nga këngëtarja dhe prindërit e saj.
Në artikull përmendet se prindërit e Dua Lipës emigruan nga Kosova në Londër gjatë viteve ’90 dhe u rikthyen pas shpalljes së pavarësisë së Kosovës në vitin 2008. Gjithashtu theksohet se këngëtarja, edhe pse ka lindur në Mbretërinë e Bashkuar, ka kaluar një pjesë të fëmijërisë në Prishtinë dhe tashmë mban edhe shtetësinë e Kosovës.
Në fund, “Harper’s Bazaar” sjell edhe mesazhin emocionues që Dua Lipa ndau pas festivalit:
“Ta ndaja këtë natë me të gjithë ju, në qytetin që më formësoi, e rrethuar nga kaq shumë energji, gëzim dhe krenari… është e vështirë të përshkruhet me fjalë se çfarë do të thotë kjo.” /Albinfo
The post “Harper’s Bazaar” i kushton artikull Dua Lipës dhe “Sunny Hill”, vë Kosovën në qendër të vëmendjes appeared first on Gazeta Express.
