Një tjetër lokacion po dyshohet për varr masiv në veri të Kosovës.
Siç ka njoftuar Prokuroria Speciale, tashmë në vendngjarje ka qenë prokurorja përgjegjëse ndërkohë, burime të televizionit Dukagjini bëjnë me dije se bëhet fjalë për një lokacion mes dy fshatrave ku tashmë ka pasur gërmime – Kalludër e Vogël dhe Jabukë.
“Gjatë hetimeve janë kontrolluar disa lokacione. Në fshatin Jabukë janë gjetur mbetje të cilat do t’i nënshtrohen ekzaminimeve mjeko-ligjore dhe analizave të ADN-së për identifikim, ndërsa gërmimet në fshatin Kalludër e Vogël po vazhdojnë. Aktualisht, hetimet po vazhdojnë në një lokacion të tretë. Prokurorja përgjegjëse ishte në vendngjarje së bashku me hetuesit nga Drejtoria për Hetimin e Krimeve të Luftës dhe ekspertët forenzikë për të mbikëqyrur veprimet hetimore”, kanë thënë nga Prokuroria Speciale.
Një ditë më parë, në fshatin Jabukë të Zubin Potokut, u gjetën katër mbetje mortore që dyshohet se i takojnë luftës së fundit.
Bashkë me to edhe një batanije të cilat tashmë janë dërguar për analiza. Por, në këtë lokacion, tashmë kanë përfunduar gërmimet.
Veç pak kilometra tutje nga Jabuka, në Kalludër të Vogël po vazhdojnë tentimet për të zbardhur të vërtetën që u fsheh për 27 vjet.
Ndonëse me ekipe të sigurisë më pak së në ditët paraprake, lokacioni po vazhdonte të jetë nën monitorimin e policisë.
Gërmimet në lokacionin që po dyshohet për varrezë masive këtu në Kalludër të Vogël po vazhdojnë edhe në ditën e tetë ndërkohë në Jabukë kanë përfunduar mbremjën e së hënës.
Me urdhër të Prokurorisë Speciale, Policia arrestoi javën e kaluar dy serbë të dyshuar për krime lufte, konkretisht për rastin e zhdukjes së 23 intelektualëve të Mitrovicës, ndërkaq një ditë më vonë filluan gërmimet për vendin e dyshuar ku ata janë vrarë.
