Roli i saj është ta ndalojë ujin, por rrjedha e tij po vazhdon lirshëm anash digës së liqenit të Mirushës në Malishevë. Kjo meqë një pjesë e kësaj dige tash e një kohë është dëmtuar.
E gjendja e saj u përkeqësua edhe më shumë në fillim të vitit 2026.
Që nga viti 2016 diga e liqenit Mirusha ka pësuar dëmtime të shumta. E gjendja u përkeqësua më shumë nga vërshimet që ndodhën në janarin e këtij viti në qytetin e Malishevës.
Çarja e i kësaj dige ka ngritur alarmin në Komunën e Malishevës.
“Sa më shumë që ka rrjedhje të ujit edhe vërshimet në pjesën e poshtme të lumit Mirusha janë më të mëdha. Këto janë pasojat e dëmtimit të digës. Gjithashtu diga në liqen është një rregullator i lumit Mirusha. Gjatë kohës kur ka sasi të madh të ujit nuk lejon shkarkimin e madh të ujit ndërsa gjatë verës kur ka sasi më të paketa rrjedh më pak uji se sa pjesa e epërme. Intervenimi duhet të jetë bukur urgjent në rregullimin por jemi në pritje nga ana e Ministrisë”, tha për Tëvë1, Artan Paçarizi, zyrtar për media në Komunën e Malishevës.
Mirëpo nga Ministria e Mjedisit dhe Planifikimit Hapësinor thonë se nuk kanë pranuar ndonjë raport nga Komuna e Malishevës për gjendjen e digës.
“Ne baze te Ligjit te Buxhetit për projektet kapitale te vitit 2026 , nuk është i përfshire ky projekt. Nuk kemi ndonjë raport nga Komuna e Malishevës për gjendjen e Digës. Ne baze te bashkëpunimit ndërinstitucional, nuk kemi ndonjë paramasë-parallogari apo projekt propozim për projektin ne fjale” u shpreh Valdete Tahiri – Azemi nga Ministria e Mjedisit, raporton Tëvë1.
Megjithatë, nga Komuna e Malishevës thonë se Ministria e Mjedisit janë të njoftuar për gjendjen.
“Ministria është e njoftuar për situatën në lumin Mirusha në tani jemi në fazën e ekzaminimit të gjendjes situatës atje dhe nevojës se çka duhet të intervenohet dhe sa është e dëmtuar, por sa është e dëmtuar është raporti që Komisioni Komunale e ka bërë raportin e dëmeve ndërsa pjesa tjetër iu takon ekspertëve të cilët janë duke u marrë, pasi komuna ka angazhuar ekspert të brendshëm dhe të jashtëm për tu marrë më situatën e digës”, sqaroi Paçarizi.
E për dëmtimin e digës nga vërshimet madje është njoftuar edhe Asociacioni Komunave të Kosovë.
“Nga kontaktet që kam pas me kryetarin e komunës së Malishevës ai thotë që diga e cila është në lumin Mirusha ka pësuar dëme të konsiderueshme gjatë fillimit të këtij viti, mirëpo nuk ka asnjë intervenim nga niveli qendror dhe në bisedë me kryetarin ka thënë se dhashë Zoti të mos ketë vërshime si të janari pasi diga ka pësuar dëmtime dhe ka mundësi që diga të mos e përballoi dhe mund të kemi pasoja edhe në jetë të qytetarëve”, tha Sazan Ibrahimi nga Asociacioni i Komunave të Kosovës.
Komuna e Malishevës nga vërshimet të cilat ndodhën në janar të këtij viti pësuan dëme në vlerë prej 540 mijë e 523 euro, ku sipas tyre ani pse është hartuar raporti ende nuk janë kompensuar këto dëme.
