Deputeti në Parlamentin e Bavarisë së Epërme, Deli Balidemaj tha se Gjermania e sheh Kosovën si një partner të rëndësishëm në aspektin politik, ekonomik dhe të sigurisë.
“Gjermania ishte ndër vendet e para që e njohu pavarësinë e Kosovës. Është një nga investitorët më të mëdhenj në Kosovë dhe Ballkanin Perëndimor, ndërsa në aspektin e sigurisë ka dhënë kontribut të madh përmes ushtarëve të KFOR-it. Kosova për Gjermaninë është një partner shumë i rëndësishëm, megjithëse mendoj se marrëdhëniet mund të jenë edhe më të mira”, tha Balidemaj.
Ai theksoi se imazhi i Kosovës në Gjermani është pozitiv te ata që e njohin vendin.
“Ata që kanë pasur kontakt me njerëz nga Kosova e njohin vendin si një vend me energji pozitive. Është e rëndësishme që Kosova të promovojë më shumë vlerat dhe potencialin e saj, sepse kjo do t’i sillte përfitime edhe shoqërisë kosovare”, u shpreh ai.
Duke folur për diasporën, Balidemaj tha se mikpritja mbetet vlerë e rëndësishme, por ritmi i jetës ka ndryshuar.
“Njerëzit sot janë të angazhuar me punë dhe nuk e kanë kohën që kishin dikur, por lidhja me Kosovën mbetet e fortë”, përfundoi ai./klankosova
