Arabia Saudite po përballet me një dilemë të vështirë. Që kur SHBA-ja dhe Izraeli nisën luftën e tyre kundër Iranit më 28 shkurt, sauditët në përgjithësi janë përpjekur të qëndrojnë jashtë saj, shkruan BBC.
Por tani, pasi janë sulmuar nga tri drejtime, sauditëve u është sosur durimi. Këtë javë, ata kryen sulme të përbashkëta me SHBA-në ndaj milicive iraniane të ndërmjetme në Irak, për të cilat besojnë se kanë lëshuar dronë drejt Mbretërisë.
Për Arabinë Saudite, dilema tani është nëse duhet të vazhdojë t’u kundërpërgjigjet sulmeve si masë parandaluese, apo të përpiqet ta ulë përshkallëzimin e situatës, ndoshta duke paguar disa prej kundërshtarëve të saj.
Pra, kush po sulmon kë dhe pse?
Në përgjithësi, janë dy palë në konfliktin që ka përfshirë Gjirin dhe pjesë të tjera të Lindjes së Mesme prej pesë muajsh.
Në njërën anë janë Irani dhe Trupat e Gardës Revolucionare Islamike (IRGC). Aleatë të tyre janë Huthët në Jemen, një grup fisnor që mori nën kontroll pjesën më të madhe të vendit në vitin 2014.
Të mbështetura gjithashtu nga Irani janë Forcat e Mobilizimit Popullor në Irak, grupi paraushtarak që dyshohet se ka kryer 30 sulme me dronë ndaj Arabisë Saudite dhe që tani është sulmuar si kundërpërgjigje.
Pastaj është Hezbollahu në Liban, ende një forcë e fuqishme, por që aktualisht po qëndron në prapavijë.
The post Dilema e Arabisë Saudite teksa përpiqet të qëndrojë jashtë luftës SHBA-Iran appeared first on Gazeta Express.
