Ish-kandidati për deputet nga Partia Demokratike e Kosovës, Shemsi Jashari, ka komentuar takimin e thirrur nga ushtruesja e detyrës së presidentes, Albulena Haxhiu, me partitë politike më 5 gusht, një ditë para seancës konstituive të Kuvendit të Kosovës që do të mbahet më 6 gusht.
Jashari, i ftuar në “FIVE” në Dukagjin, u shpreh se e e cilësoi këtë takim si të vonshëm dhe të pajustifikueshëm, duke vlerësuar se vendi ka nevojë urgjente për krijimin e institucioneve të reja.
“Me siguri në takimin e së premtës do të shkojnë dy bashkëkryetarët e partisë, Lumiri dhe Vjosa, ata edhe në takimin paraprakë ishin bashkë. Mirëpo, ajo që dihet është se është takim i vonshëm dhe i paarsyeshëm në kuptimin e kohës dhe nevojës e urgjencës që vendi ka për krijimin e institucioneve – me i konsumu 30 ditë afat për të thirrë seancën e konstituimit të Kuvendit duke i ditur rezultatet është një papërgjegjësi totale e Vetëvendosjes pasi do duhej që në momentin që janë certifikuar rezultatet e zgjedhjeve të konstituohet Kuvendi e pastaj të formohet Qeveria”, u shpreh Jashari.
Ai shtoi se konstituimi i institucioneve nuk duhet të kushtëzohet nga gjendja e brendshme e një subjekti politik, duke përmendur në këtë rast LDK-në.
Sipas tij, nga Lëvizja Vetëvendosje do të duhej të zhvillohej një dialog me të gjitha partitë politike për interesin e vendit dhe jo për interesa partiake.
“Nuk do të duhej që të vonohet konstituimi i institucioneve me gjendjen e brendshme të një subjekti politik, në këtë rast me LDK-në, do të duhej te ishte një dialog me të gjitha partitë për të mirën e vendit dhe jo interesat partiake – për kuvend e qeveri duket se nuk ka problem për shkak të numrave por ka pasur zëra që Lëvizja Vetëvendosje bashkë me partnerët i ka vetëm 60 numra që mbase kjo edhe ka qenë arsyeja e vonesës”, u shpreh Jashari.
