Federata Sindikale e Punëtorëve Teknikë të Sektorit Privat ka njoftuar se nga dita e nesërme punëtorët teknikë të shkollave fillore në Komunën e Prishtinës do të hyjnë në grevë, për shkak të mos ekzekutimit të pagave për muajin qershor.
Vendimi është marrë pas një takimi të zhvilluar me shoqatat sindikale të kësaj kategorie, ku është diskutuar situata e krijuar lidhur me vonesën e pagave.
Sipas njoftimit të Federatës, punëtorët teknikë do të pezullojnë ofrimin e shërbimeve dhe do të qëndrojnë në grevë deri në realizimin e pagesave të prapambetura.
Në të njëjtin takim, përfaqësues të Komunës së Prishtinës kanë bërë të ditur se pagat pritet të transferohen në llogaritë bankare të punëtorëve më së largu deri të hënën, më 3 gusht..
“Pas diskutimeve, në takim u mor vendim që nga dita e nesërme punëtorët teknikë të mos kryejnë shërbime dhe të qëndrojnë në grevë deri në realizimin e pagesave. Gjithashtu, gjatë këtij takimi u bë e ditur nga Komuna e Prishtinës se pagat do të transferohen në llogaritë bankare të këtyre punëtorëve më së largu deri të hënën, më 03.08.2026”, thuhet në komunikatën për media të kësaj Federate Sindikale.
