Kryesuesi i Këshillit Prokurorial të Kosovës, Arian Gashi, së bashku me anëtarët Elza Bajrami-Kastrati, Visar Krasniqi dhe Arlinda Muqa, si dhe Drejtorin e Përgjithshëm të Sekretariatit të KPK-së, kanë zhvilluar një vizitë te Kryeprokurori i Shtetit, Zejnullah Gashi.
Sipas njoftimit të KPK-së, gjatë takimit, Gashi i shprehu Kryeprokurorit të Shtetit mbështetjen dhe bashkëpunimin e plotë institucional të Këshillit Prokurorial në ushtrimin e përgjegjësive dhe realizimin e mandatit të tij kushtetues e ligjor, njofton Dukagjini.
Ai theksoi se KPK-ja do të vazhdojë të sigurojë kushtet e nevojshme institucionale, administrative dhe organizative për funksionimin e pavarur, profesional dhe efikas të Zyrës së Kryeprokurorit të Shtetit dhe të gjithë sistemit prokurorial.
Sipas Gashit, koordinimi i ngushtë ndërinstitucional është thelbësor për ngritjen e kapaciteteve profesionale, rritjen e efikasitetit në luftimin e kriminalitetit, avancimin e reformave dhe forcimin e besimit të qytetarëve në institucionet e drejtësisë.
Gjatë takimit, u riafirmua përkushtimi i institucioneve që përfaqësojnë për garantimin e sundimit të ligjit dhe forcimin e luftës kundër kriminalitetit në Kosovë.
Ata theksuan se luftimi i korrupsionit të nivelit të lartë, krimit të organizuar dhe çdo forme tjetër të kriminalitetit mbetet prioritet institucional, duke nënvizuar se Prokurori i Shtetit do të ushtrojë kompetencat e tij me profesionalizëm, integritet dhe paanshmëri, duke zbatuar ligjin në mënyrë të barabartë ndaj secilit, pa dallim pozite apo funksioni.
Nga ana e tij, Kryeprokurori i Shtetit, falënderoi kryesuesin dhe anëtarët e KPK-së për vizitën, duke vlerësuar gatishmërinë e Këshillit për të vazhduar bashkëpunimin institucional.
Ai theksoi se koordinimi ndërmjet dy institucioneve është i një rëndësie të veçantë për realizimin e mandatit kushtetues të prokurorisë, fuqizimin e sundimit të ligjit dhe rritjen e efikasitetit të sistemit prokurorial.
