Ditën e nxehtë të verës zgjodhën ta kalojnë në “Pishinën e Gërmisë” në kryeqytet.
Por, më të arritur tek dyert e saj, qytetarët e kuptuan se të mërkurën ishin të mbyllura.
Krejt kjo meqë Instituti Kombëtar i Shëndetësisë Publike të Kosovës mori mostra për analizimin laboratorik të ujit të kësaj pishine.
E për këtë mbyllje të përkohshme, duket se nuk ishin në dijeni vizitorët.
“Unë erdha nuk kom pas njohuri që ka qenë e mbyllur, vetëm kom dëgjua së është hap edhe jam gzu se shkojmë freskohemi”, u shpreh Aferdita Gumlia – qytetare.
“Jo se kom pa, unë çdo ditë vi nga 3-4 orë, keq boll pse me mbyll”, tha Mehmet Fazliu një tjetër vizitor që të mërkurën ishte në pishinë.
Ndërkohë, drejtuesit e ndërmarrjes që menaxhojnë Pishinën e Gërmisë thonë se deri më tani nuk kanë pranuar ankesa nga vizitorët për ujin.
“Uji kontrollohet edhe prej stafit të brendshëm sepse e kemi mikrobiologun të punësuar, faktikisht në suaza javore i bën analizat dhe i dërgon si raport të cilat ne i kemi të dokumentuara, ndërsa IKSHPK është ftuar i cili duhet me vepru, kanë ardhë sot i kanë marrë mostrat ne i respektojmë rregullat e tyre edhe po presim, sipas gjitha gjasave vlerat janë normale”, tha Bardh Krasniqi – “NPL sport marketing”.
E ai që e njoftoi IKSHPK-në thotë se është Enver Redenica nga Lëvizja Vetëvendosje në Komunën e Prishtinës.
Ky i fundit thotë se në drejtim të tij, shkuan shumë ankesa nga qytetarët për cilësinë e ujit në këtë pishinë.
“Qytetarët këto ditët e fundit kanë bo ankesa në drejtim meje si asamblist i VV të cilët kanë vërejt që uji ka probleme dmth është shumë i papastër, unë mendova që po rregullohet kjo punë por kaluan disa ditë dhe qytetarët bënin ankesa rregullisht iu drejtova IKSHPK-së për inspektim të ujit me shiku se a është uji i pastër. Nuk janë në gjendje një aparat për filtrimin e ujit me ble edhe me këtë unë mendoj që ka bë vepër penale për arsye po rrezikojnë jetën e qytetarëve, e vitin e kaluar kemi pasë edhe qytetar të lënduar në këtë pjesë”, tha ai.
Ndërkohë nga Instituti Kombëtar i Shëndetësisë Publike të Kosovës, thonë se analizat laboratorike janë në proces.
“Pas pranimit të kërkesës, IKSHPK ka ndërmarrë procedurat për marrjen e mostrave dhe kryerjen e analizave laboratorike, në përputhje me procedurat standarde të punës”, thuhet nga IKSHPK.
E derisa IKSHPK të dal me rezultatet, qytetarëve të Prishtinës do t’u duhet të gjejnë alternativa të tjera për t’u freskuar në ditët e nxehta të verës.
