Finalet e playoff-it në basketbollin kosovar rikthejnë edhe një herë përballjen e madhe mes KB Bashkimit dhe KB Trepça, dy skuadrave që vitet e fundit kanë dominuar skenën vendore dhe kanë krijuar një nga rivalitetet më të forta në vend.
Takimi i parë i serisë finale zhvillohet nesër nga ora 19:30 në palestrën “Minatori” në Mitrovicë, duke hapur një tjetër kapitull të një përballjeje që tashmë është bërë tradicionale në finalet e basketbollit kosovar, transmeton GazetaBlic Sport.
Këto dy skuadra janë përballur shpesh në finale gjatë dy sezoneve të fundit, përfshirë dy finale kampionati dhe një finale të Kupës dhe gjithmonë kanë dhuruar spektakël të madh në parket.
Atmosfera pritet të jetë e jashtëzakonshme që nga ndeshja e nesërme e deri tek ndeshja e fundit, me dy tifo-grupet që kanë mbushur palestrat dhe kanë qenë lojtari i gjashtë për skuadrat e tyre.
/GazetaBlic Sport/
