Gazmen Tairovci, imami 47-vjeçar i fshatit Zlipotok i Dragashit mbrëmë është therur me thikë për vdekje.
Zëdhënësi i Policisë së Kosovës për rajonin e Prizrenit, Shaqir Bytyqi, ka thënë për “Zërin”, se i njëjti është gjetur i shtrirë në tokë kur ka arritur policia në vendin e ngjarjes.
“Më datë 29.06.2026, rreth orës 23:15, policia është njoftuar përmes telefonit se në fshatin Zlipotok, komuna e Dragashit, kishte ndodhur një rrahje mes disa personave. Me arritjen në vendin e ngjarjes, patrulla policore ka gjetur një person të shtrirë në tokë. Dyshohet se lëndimet i janë shkaktuar me një mjet të mprehtë. Pas arritjes së ekipit mjekësor nga QKMF Dragash, mjeku kujdestar ka konstatuar vdekjen e viktimës, G.T., mashkull rreth 47-vjeçar nga Zlipotoku i Dragashit”, ka treguar Bytyqi.
Bytyqi ka bërë të ditur se tashmë është identifikuar një 40-vjeçar si i dyshuar për këtë vrasje, por që i njëjti është akoma në arrati dhe se Policia ka ndërmarrë të gjitha veprimet për arrestimin e tij.
“I dyshuari është identifikuar si B.H., mashkull 40-vjeçar nga Zlipotoku. I njëjti ndodhet në arrati, ndërsa që nga mbrëmja e kaluar policia është duke ndërmarrë veprime intensive për lokalizimin dhe arrestimin e tij. Në vendin e ngjarjes kanë dalë njësitet relevante të Stacionit Policor në Dragash, komandanti i stacionit, si dhe është njoftuar Njësia Rajonale e Hetimeve në Prizren, të cilës më vonë i janë bashkuar edhe njësi të tjera policore. Hetimet janë duke u zhvilluar në koordinim me prokurorin e shtetit”, ka treguar Bytyqi. /Zëri
