Gjermania, Çekia, Polonia dhe Hungaria kanë regjistruar temperatura rekord mbi 40 gradë Celsius të dielën, ndërsa një valë e të nxehtit që ka shkaktuar qindra viktima në Evropën Perëndimore është përhapur drejt lindjes së kontinentit.
Sipas të dhënave paraprake të shërbimeve meteorologjike, mbi 191 milionë njerëz në Evropë janë përballur me temperatura të paktën 35°C, duke nxitur paralajmërime të shumta për rrezik ekstrem nga i nxehti.
Në Gjermani, u shënua një rekord i ri historik prej 41.7°C në Coschen, pranë kufirit me Poloninë, duke thyer rekordin e një dite më parë prej 41.5°C. Në disa zona të Brandenburgut dhe Saksonisë, temperaturat ekstreme kanë shkaktuar edhe zjarre në pyje, raporton The Guardian.
Në Gohrischheide, një zjarr shpërtheu në një zonë pyjore të kontaminuar me municione të Luftës së Dytë Botërore, duke vështirësuar ndërhyrjen e zjarrfikësve. Po ashtu, në një ish-depo municionesh pranë Traisenit, operacionet e shuarjes së zjarrit u ndërprenë përkohësisht pas shpërthimeve të vogla, ndërsa rreth 650 banorë u evakuuan nga shtëpitë e tyre.
Në Berlin, policia përdori topa uji për të freskuar qytetarët dhe turistët, ndërsa kompania hekurudhore Deutsche Bahn u bëri thirrje qytetarëve të shmangin udhëtimet jo të domosdoshme.
Në Poloni, u regjistrua një rekord historik prej 40.5°C në Słubice, duke thyer një rekord që kishte qëndruar për 105 vjet. Autoritetet u dërguan qytetarëve mesazhe paralajmëruese për të shmangur ekspozimin në diell, për të pirë ujë dhe për të kufizuar aktivitetin fizik.
Hungaria raportoi gjithashtu një rekord të ri prej 40.7°C në Budakalász, ndërsa Çekia shënoi 41.9°C në Doksany, temperatura më e lartë e regjistruar ndonjëherë në vend.
Në Sllovaki u regjistruan 39.3°C, ndërsa Danimarka shënoi temperaturën më të lartë që nga fillimi i matjeve në vitin 1874, me 36.6°C.
Ndërkohë, në Francë po bëhen vlerësimet e para për pasojat e valës së të nxehtit. Autoritetet shëndetësore raportojnë rreth 1,000 vdekje më shumë se mesatarja normale gjatë periudhës 24–27 qershor, shifra që pritet të rritet më tej.
Shumica e viktimave janë persona mbi 65 vjeç, ndërsa raste janë raportuar edhe tek grupmosha më të reja. Shërbimet emergjente në Francë kanë trajtuar mbi 122,000 thirrje gjatë ditëve më të nxehta.
Në Spanjë, të paktën 327 vdekje dyshohet se lidhen me temperaturat ekstreme vetëm gjatë javës së fundit.
Përveç të nxehtit, pjesë të Francës veriore janë goditur edhe nga stuhi të forta, me rrufe, erëra të fuqishme dhe përmbytje lokale, duke lënë mbi 60,000 shtëpi pa energji elektrike dhe duke shkaktuar lëndime në disa rajone.
