Inspektorati Qendror i Tregut (IQMT), në kuadër të Ministrisë së Industrisë, Ndërmarrësisë, Tregtisë dhe Inovacionit (MINTI), ka intensifikuar aksionet inspektuese për parandalimin dhe luftimin e shitjes ilegale të cigareve elektronike te personat e mitur.
Sipas njoftimit të MINTI-t, gjatë pjesës së parë të muajit qershor 2026, inspektimet janë fokusuar kryesisht në bizneset që operojnë në afërsi të shkollave dhe që merren me shitjen e cigareve elektronike.
Kontrollet janë zhvilluar në komunat e Prishtinës, Prizrenit, Gjilanit, Vushtrrisë, Ferizajt dhe Vitisë, ku inspektorët kanë verifikuar zbatimin e Ligjit Nr. 04/L-156 për Kontrollin e Duhanit, në veçanti dispozitat që lidhen me shitjen e produkteve të duhanit dhe produkteve të ngjashme.
MINTI bëri të ditur se shkeljet e evidentuara gjatë këtyre inspektimeve janë në procedurë trajtimi dhe do të ndiqen në përputhje me legjislacionin në fuqi.
Ndërkaq, Inspektorati Qendror i Tregut ka paralajmëruar se do të vazhdojë me aktivitete të ngjashme inspektuese në të gjithë territorin e Kosovës.
“MINTI mbetet e përkushtuar në mbrojtjen e shëndetit publik, veçanërisht të të rinjve, si dhe në zbatimin e Ligjit për Kontrollin e Duhanit, duke vendosur theks të veçantë në mbrojtjen e të miturve nga qasja në produkte që mund të cenojnë mirëqenien e tyre”, thuhet në njoftim.
