Në Gjykatën e Apelit është shqyrtuar të hënën çështja penale ndaj Endrit Nikës, i cili është dënuar me 18 vjet burgim për vrasjen e shtetases argjentinase M.K-U., në një hotel në Fushë-Kosovë në vitin 2023.
Prokuroria Themelore në Prishtinë ka kërkuar ashpërsimin e dënimit të shqiptuar nga Gjykata Themelore, ndërsa përfaqësuesi i familjes së viktimës, avokati Betim Shala, ka kërkuar dënim me burgim të përjetshëm për Nikën.
Siç raporton ‘Betimi për Drejtësi’, nga ana tjetër, mbrojtja e të akuzuarit, e përfaqësuar nga avokati Tomë Gashi, ka kërkuar rrëzimin e aktgjykimit, duke pretenduar se ai është marrë me shkelje të dispozitave ligjore dhe mbi bazën e një vlerësimi të gabuar të provave.
Gashi argumentoi se vdekja e argjentinases nuk është shkaktuar nga klienti i tij, por nga kushtet e pasigurta të objektit ku ndodhi ngjarja. Sipas tij, përgjegjësia duhet t’i atribuohet pronarit të hotelit, pasi dritarja me gjithë kornizë ishte shkëputur për shkak të lëshimeve në ndërtim.
Avokati tha se ka dorëzuar edhe një ekspertizë shtesë të përpiluar nga një inxhinier ndërtimor, si dhe kallëzim penal ndaj pronarit të objektit dhe menaxherit të tij për disa vepra penale.
Mbrojtja ngriti gjithashtu pretendime për parregullsi procedurale gjatë gjykimit, duke përmendur mungesën e përkthyesit në një fazë të procedurës, përjashtimin e publikut nga një seancë dhe mungesën e disa incizimeve të rëndësishme nga kamerat e sigurisë.
Sipas avokatit Gashi, aktgjykimi është bazuar në një super-ekspertizë të kryer një vit e gjysmë pas ngjarjes, ndërsa gjendja e dritares në atë kohë nuk ka qenë e njëjtë me atë të momentit kur ndodhi rasti.
Ndërkohë, Prokuroria e Apelit ka mbështetur ankesën e Prokurorisë Themelore dhe të palës së dëmtuar, duke kërkuar një dënim më të rëndë për Nikën dhe refuzimin e ankesës së mbrojtjes.
Sipas aktakuzës, Nika akuzohet se pas një konflikti me të dashurën e tij, e kishte sulmuar fizikisht dhe më pas, gjatë përleshjes në dhomën e hotelit, e kishte hedhur nga dritarja e katit të gjashtë, duke i shkaktuar lëndime fatale.
