Eksperti britanik, Eric Gordy, vlerëson se rezultatet e fundit zgjedhore në Kosovë tregojnë dy prirje të qarta.
Sipas tij, kryeministri në detyrë Albin Kurti vazhdon të jetë politikani më i popullarizuar në vend, megjithëse me një nivel më të ulët mbështetjeje krahasuar me vitet e kaluara, ndërsa përpjekjet për të krijuar një alternativë politike për serbët e Kosovës ndaj strukturave të lidhura me regjimin e Aleksandar Vucic nuk kanë dhënë rezultate.
“Duket se rezultatet e zgjedhjeve kanë treguar dy gjëra kryesore: Kurti mbetet ende politikani më i popullarizuar në vend, por nuk është aq i popullarizuar sa ka qenë më parë dhe ka pasur shumë përpjekje për të krijuar një alternativë për serbët ndaj partisë së kontrolluar nga regjimi i Vuçiqit, por asnjëra prej tyre nuk ka pasur sukses”, thotë ai.
Sipas Gordyt, suksesi i vazhdueshëm i Lëvizjes Vetëvendosje nuk lidhet vetëm me figurën e Kurtit.
Ai thekson se Kurti ka shkaktuar pakënaqësi në disa raste, përfshirë raportet me Bashkimin Evropian dhe disa vendime të brendshme politike.
Megjithatë, ai argumenton se faktori kryesor që e mban Vetëvendosjen në krye është mungesa e një alternative të qartë dhe bindëse nga partitë opozitare.
“Arsyeja kryesore pse Vetëvendosja vazhdon të fitojë është se askush nuk po artikulon një alternativë koherente. Votuesit që mund të jenë të gatshëm të mbështesin opozitën nuk kanë përgjigje të qartë se cilën parti duhet të zgjedhin dhe pse”, vlerëson Gordy për GazetaBlic.
