Konfiskohen afro 18 kilogramë marihuanë në Kaçanik, arrestohen dy persona

Policia e Kosovës ka arrestuar dy persona të dyshuar për përfshirje në veprimtari të paligjshme me narkotikë, ndërsa gjatë aksionit janë konfiskuar afro 18 kilogramë substancë e dyshuar marihuanë.

Sipas njoftimit të Policisë, rasti ka ndodhur më 19 qershor, rreth orës 17:30, kur hetuesit e Stacionit Policor në Kaçanik kanë tentuar të ndalojnë një automjet për kontroll. Drejtuesi i veturës nuk i është bindur urdhrit të policisë dhe përkohësisht ka arritur t’i shmanget ndalimit.

Pas angazhimit të njësive të ndryshme policore, automjeti është lokalizuar dhe ndaluar. Gjatë veprimeve hetimore, hetuesit e Drejtorisë për Hetimin e Trafikimit me Narkotikë (DHTN) në Ferizaj kanë kontrolluar rrugën në të cilën dyshohej se kishte kaluar vetura dhe në një hapësirë me mbeturina kanë gjetur tre thasë të hedhur me substancë të dyshuar narkotike të llojit marihuanë.

Sipas Policisë, ekziston dyshimi se substanca është hedhur nga personat që ndodheshin në automjetin që tentoi t’i shmangej kontrollit policor.

Pesha totale e substancës së konfiskuar është 17 kilogramë e 834.6 gramë. Gjithashtu, janë sekuestruar edhe prova të tjera që lidhen me rastin.

Në kuadër të hetimeve janë arrestuar dy të dyshuar, F.K. (1961), shtetas i Republikës së Shqipërisë, dhe A.C. (2001), shtetas i Republikës së Maqedonisë së Veriut, nën dyshimin për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.

Me vendim të prokurorit kujdestar të Prokurorisë Themelore në Ferizaj, të dyshuarit janë ndaluar për 48 orë, ndërsa hetimet lidhur me rastin janë duke vazhduar./teve1.info/