Kryeministri në detyrë i Kosovës, Albin Kurti, ka marrë pjesë në ceremoninë e diplomimit të 420 studentëve të Universitetit “Ukshin Hoti” në Prizren.
Në fjalën e tij para të diplomuarve, Kurti e lidhi ngjarjen me rëndësinë historike të qytetit të Prizrenit, duke kujtuar Lidhjen e Prizrenit dhe figurën e Ukshin Hotit.
“Sa herë vijmë në Prizren, na kujtohet Lidhja e Prizrenit e 10 qershorit 1878, një nga ngjarjet themeltare të historisë sonë kombëtare. Vetëm pak ditë më parë shënuam 148-vjetorin e saj. E sot jemi sërish në këtë qytet, në diplomimin e 420 studentëve të Universitetit ‘Ukshin Hoti’, teksa kujtojmë edhe 83-vjetorin e lindjes së Prof. Ukshinit”, tha Kurti.
Ai vuri në pah edhe pjesëmarrjen e lartë të vajzave dhe grave në këtë universitet, duke theksuar rëndësinë e tyre në zhvillimin e shoqërisë.
“Nga rreth katër mijë studentë aktivë në Universitetin ‘Ukshin Hoti’, afërsisht 70 për qind janë vajza dhe gra. Kur një vajzë hyn në tregun e punës, nuk ndryshon vetëm jeta e saj, por ndryshon drejtimi i shoqërisë dhe përmirësohet e ardhmja e vendit”, u shpreh ai.
Kurti tha se Qeveria po punon për forcimin e arsimit të lartë dhe ndërkombëtarizimin e universiteteve, duke mirëpritur edhe kontributin e profesionistëve nga diaspora.
“Po i kushtojmë rëndësi të posaçme ndërkombëtarizimit të kapaciteteve akademike. Na gëzon fakti që profesionistë dhe akademikë nga mërgata jonë po kthehen për ta dhënë përvojën e tyre profesionale në institucionet tona të arsimit të lartë”, deklaroi ai.
Duke folur për të ardhmen e sektorit të arsimit, Kurti tha se mandati i ardhshëm do të fokusohet në transformimin dhe ristrukturimin e arsimit të lartë në Kosovë.
“Zhvillojeni veten duke besuar, duke guxuar dhe duke punuar në vazhdimësi. Qeveria juaj do të vazhdojë të jetë partnere e juaja drejt sukseseve të reja dhe aspiratave tuaja”, ishte mesazhi i tij për studentët e diplomuar.
