Kryeministri në detyrë i Kosovës, Albin Kurti, ka bërë thirrje për pjesëmarrje sa më të madhe në votime, përmes një videomesazhi të publikuar në Facebook në ditën e zgjedhjeve.
Ai u është drejtuar qytetarëve që ende nuk kanë votuar, duke i ftuar të shfrytëzojnë kohën e mbetur deri në mbylljen e vendvotimeve.
“Kanë mbetur më pak se tri orë kohë për të votuar. Të gjithë ju që ende nuk keni votuar, ju lutem ta bëni një gjë të tillë. Për pak minuta vendosim për zhvillim, siguri e stabilitet për vendin tonë”, ka thënë Kurti.
Ai u ka bërë thirrje edhe qytetarëve që tashmë kanë votuar që të inkurajojnë familjarët, miqtë dhe të afërmit të marrin pjesë në procesin zgjedhor.
“Sa më e gjerë vendimmarrja, aq më e fortë demokracia dhe Republika jonë”, është shprehur ai.
Kurti ka rikujtuar gjithashtu se qytetarët që ndodhen në komuna të tjera për shkak të angazhimeve mund të votojnë me kusht në komunën ku gjenden.
Në fund të mesazhit të tij, ai ka përsëritur thirrjen për të mos e lënë votimin për momentet e fundit.
“Dil dhe voto, pak kohë ka mbetur, mos e lër për në fund”, deklaroi Kurti. /Zëri
