Vendosja e mbishkrimit dhe largimi i atij që ishte paraprakisht me shkronja çirilicë, nuk ishte pritur mirë nga një pjesë e serbëve në Mitrovicë të Veriut.
Madje, me rikthimin në pushtet të Listës Serbe, Kuvendi komunal miratoi largimin e këtij obelisku.
E të premten, vet kryetari i Mitrovicës së Veriut, Milan Radojeviq, vendosi ta vandalizoj këtë mbishkrim.
Iniciativës së Radojeviçit iu bashkuan edhe dhjetëra qytetarë, mes tyre edhe ish-kryesuesi i Kuvendit Komunal.
Veprimi solli intervenimin e Policisë, dhe Radojeviq bashkë me Nemanja Bishevac përfunduan të ndaluar në stacionin policor.
Arrestimi dhe intervistimi u përcoll nga afër nga akterë të Listës Serbe.
“Në vendin e ngjarjes, ka ardhur kryetari i komunës së Mitrovicës së Veriut me rreth njëzetë (20) persona, ku në mesin e tyre ka qenë edhe kryesuesi i Kuvendit Komunal Mitrovicë Veri, të cilët pasi janë njoftuar nga komandanti i stacionit policor rreth situatës, kryetari pas dhënies së intervistës për media, iu është drejtuar zyrtarëve policorë me fjalë “tani do të ngjyrosim me ngjyrë emblemën”, thuhet nga Policia e Kosovës.
Pas rreth një ore, dyshja u lirua në procedurë të rregullt, duke iu shqiptuar një gjobë për kundërvajtje.
Arrestimin e tij, Radojeviç, e konsideron të paligjshëm e të orkestruar nga Qeveria e Kosovës.
“Fatkeqësisht, ju e shihni që regjimi i Kurtit po përdor policinë për të mbrojtur vendimet e paligjshme dhe objektet e paligjshme. Siç ishte rasti disa ditë më parë me instalimin e tabelave që janë plotësisht në kundërshtim me ligjin dhe vendimet e kuvendit lokal. Kështu është edhe kjo herë, ku qeveria lokale merr vendime, por niveli qendror i zbaton ato përmes shkopinjve, çizmeve dhe policisë. Lufta jonë vazhdon. Ne donim vetëm të dërgonim një mesazh politik, asgjë tjetër. Ata ishin të pasjellshëm dhe sigurisht që ne do të iniciojmë gjithçka në përputhje me ligjin dhe do të padisim ata që u sollën kundër ligjit”, tha Radojeviç.
Nga kryesuesi i Kuvendit, u tha se ka vendim komunal për heqjen e atij mbishkrimi dhe çdo veprim i tyre ishte i ligjshëm.
“Siç e keni parë, ne kemi marrë një vendim ligjor dhe legjitim për të hequr atë tabelë. Madje u punësua edhe një kompani përmes komunës. Absolutisht gjithçka është e pastër dhe ligjore”.
Pas incidentit, tek obelisku u pa prezencë e shtuar e Policisë së Kosovës, të cilët po vëzhgonin terrenin./teve1
