Ministri në detyrë i Bujqësisë, Armend Muja, ka nënshkruar Udhëzimin Administrativ për Pagesat Direkte – Subvencionet 2026, duke hapur rrugën për fillimin e thirrjes së re për mbështetjen e fermerëve në Kosovë.
Sipas këtij udhëzimi, Agjencia për Zhvillimin e Bujqësisë obligohet të nisë procedurat për aplikim, ndërsa pagesat pritet të realizohen pas verifikimeve përkatëse, brenda afateve të përcaktuara.
Ndër risitë kryesore për vitin 2026 përfshihen: 30% rritje për sipërfaqet e mbjella me perime në fushë të hapur dhe në serra, 30% për pemët, 20% për grurin me rendiment të lartë, si dhe 20% për mjedrat, patatet dhe fasulet.
Po ashtu, është paraparë 20% rritje për mbështetjen e mëshqerrave për riprodhim dhe viçave për majmëri, 10% rritje për vreshtat, si dhe subvencion prej 7 cent për litër për qumështin.
Masat e reja përfshijnë edhe 100 euro shtesë për fermerët që kultivojnë hektarin e parë, 100 euro për hektar për pleh artificial, 54 euro për hektar për naftë, si dhe 500 euro mbështetje për të rinjtë e moshës 18–29 vjeç që regjistrohen për herë të parë në skemat e pagesave direkte.
Sipas Mujës, të gjitha kulturat e tjera do të mbeten sipas nivelit të vitit të kaluar.
Muja ka theksuar se kjo paketë synon të rrisë mbështetjen për prodhimin vendor dhe të forcojë qëndrueshmërinë dhe konkurrueshmërinë e sektorit të bujqësisë.
Ai ka shtuar se udhëzimi është konceptuar si një kornizë afatgjatë, sipas praktikave të Bashkimit Evropian, me qëllim që thirrjet për aplikim të hapen me kohë dhe fermerët të kenë mundësi më të mirë planifikimi të prodhimit dhe investimeve.
