Një ditë pas humbjes nga Çekia, Kombëtarja e Kosovës është rikthyer në stërvitje për t’u bërë gati për miqësoren e dytë.
Të dielën, Kosova pësoi 2:1 në Pragë, ndërsa të hënën ka vazhduar përgatitjet për ndeshjen kundër Andorrës, që e luan këtë fundjavë.
Seanca stërvitore është mbajtur në stadiumin “Fadil Vokrri” në Prishtinë, ndërsa morën pjesë vetëm 11-të futbollistë.
“Në seancën e sotme stërvitore në stadiumin “Fadil Vokrri” morën pjesë 11 futbollistë, ndërsa pjesa tjetër e ekipit zhvilloi program rigjenerues në hotel pas angazhimit në ndeshjen ndaj Çekisë”, ka shkruar FFK në njoftim.
Mesfushori Lindon Emërllahu, i cili shënoi golin ndaj Çekisë ka folur pas stërvitjes të së hënës, duke shtuar se pret një paraqitje dukshëm më të mirë kundër Andorrës.
FFK bëri të ditur se puna vazhdon me fokus maksimal drejt miqësores së dytë, ndërsa Kosova dhe Andorra do të përballen të dielën mbrëma në kryeqytet.
