Një valë e pazakontë e të nxehtit ka përfshirë Europën Perëndimore, duke thyer rekorde temperaturash dhe duke shkaktuar viktima. Sipas meteorologëve, shkaku kryesor i temperaturave ekstreme në Europën Perëndimore është fenomeni i njohur si “kupola termike”.
Kupola termike është një zonë e madhe presioni të lartë atmosferik që “parkohet” mbi një rajon dhe vepron si kapak mbi ajrin e nxehtë (foto ilustruese lart).
Duhet menduar si kapak tenxhereje. Ajri i nxehtë bllokohet poshtë, zbret drejt tokës, ngjeshet dhe nxehet edhe më shumë. Ndërkohë, presioni i lartë pengon formimin e reve dhe reshjeve, kështu që dielli e ngroh tokën çdo ditë pa shumë ndërprerje. Kjo ka rritur temperaturat deri në 10-15 gradë mbi mesataren sezonale, sqaron Lapsi.al.
Britania e Madhe po përballet me një situatë të paprecedentë, me 11 viktima të raportuara deri tani si pasojë e temperaturave të larta.
Në Londër, termometri arriti deri në 35.1°C, duke thyer rekorde që qëndronin prej më shumë se një shekulli. Vendi po përjeton gjithashtu net tropikale të njëpasnjëshme, me temperatura që nuk zbresin nën 20°C.
Në Francë, autoritetet kanë vendosur në alarm portokalli dhjetëra rajone, përfshirë Parisin.
Deri më tani janë raportuar shtatë viktima, ndërsa temperaturat kanë arritur deri në 39°C. Masa emergjente janë aktivizuar edhe për të kufizuar trafikun dhe ndotjen në zonat më të prekura.
Edhe Spanja po përballet me temperatura që i afrohen ose tejkalojnë 40°C, veçanërisht në Andaluzia dhe rajonet qendrore të vendit.
Në qytete si Sevilja, Kordoba dhe Toledo, nxehtësia po kujton kulmin e verës së korrikut.
Rekorde historike janë regjistruar edhe në Portugali, ku termometri shënoi 40.3°C, temperatura më e lartë e regjistruar ndonjëherë për muajin maj.
Ndërkohë, në Itali, qytete të mëdha si Roma, Firence, Bolonja dhe Torino janë vendosur në alarm të kuq, me autoritetet që paralajmërojnë për rrezik serioz për shëndetin publik.
The post Ç’është “kupola termike” që po shkakton temperaturat që po e përvëlojnë Europën appeared first on Gazeta Express.
