Analistja politike Pranvera Ejupi vlerëson se Aleanca ka hyrë në një fazë të rëndësishme reformimi, duke theksuar se ndryshimet brenda partisë kanë qenë të nevojshme prej vitesh.
Sipas saj, vendimi për të nisur procesin e reformës ka ndodhur në kohën e duhur, pasi Aleanca ka qenë vazhdimisht objekt kritikash për mungesë të ndryshimeve në strukturat drejtuese.
“Aleanca dhe vetë ish-kryetari Haradinaj e kanë bërë momentumin në kohën më të mirë për reformë. Reforma në Aleancë është e nevojshme që sa vite. Aleanca ka qenë në momentumin e fundit për të bërë një reformë, për arsye që në vazhdimësi është kritikuar që nuk po ndërron asgjë”, deklaroi ajo në emisionin “Këndi i Debatit” në Tëvë1.
Ajo theksoi se një nga arsyet kryesore për këto kritika ka qenë fakti që Ramush Haradinaj për një periudhë të gjatë ka udhëhequr si partinë, ashtu edhe ka qenë figurë qendrore në vendimmarrje.
“Ka qenë një kohë e gjatë që ka qeverisur dhe ka qenë në krye të subjektit politik vetëm Haradinaj. Natyrisht, figura e tij është shumë e fortë dhe për këtë arsye nuk është ndërruar aq shpesh lideri”, u shpreh ajo.
Duke komentuar zhvillimet e fundit brenda Aleancës, Ejupi tha se Haradinaj po i jep mbështetje të plotë kandidaturës së Ardian Gjinit për kryeministër, me synimin që partia të arrijë rezultate më të mira në zgjedhjet e 7 qershorit.
“Haradinaj është ‘full-in’, bazuar në atë që po shohim. Ai e përkrah komplet Gjinin në mënyrë që të dalë me rezultat më të mirë sesa kanë qenë deri më tani”, deklaroi Ejupi.
Sipas analistes, procesi i reformimit mund të shënojë një kapitull të ri për Aleancën dhe të ndikojë në pozicionimin e saj në skenën politike të Kosovës.
/teve1.info/
