Shkelzen Jusaj, pronar i “Petrol Company” dhe kryetar i Bordit të Bizneseve Gjermano-Kosovare, në EURO n’T7 ka thënë se gjatë fushatës elektorale partitë politike po paraqesin programe të cilat mund të ndihmojnë zhvillimin e bizneseve dhe ekonomisë së vendit, por që problem mbetet implementimi i tyre.
Sipas tij, Kosova në vazhdimësi ka pasur rritje ekonomike, herë më shumë e herë më pak, mirëpo kjo rritje nuk ka qenë e mjaftueshme për rrethanat dhe kërkesat e bizneseve dhe ekonomive familjare.
“Ne kemi pasur të hyra për kokë banori rreth gjashtë mijë dollarë, ndërsa në tri vitet e fundit ka shkuar deri në 6500 dollarë. Mirëpo, kur i bëjmë krahasimet me vendet përreth, ne krenohemi se kemi rritje 5%, ndërsa ata 3%, por kur i krahasojmë vlerat, na del që rritja reale tek ne është më e vogël. Kjo për faktin se 3% në 15 mijë dollarë është 300, ndërsa në 6000 dollarë sa është tek ne, rritja del më pak se 200 dollarë. Pra, nuk duhet të krenohemi vetëm me përqindje, por me rritjen reale të të ardhurave për kokë banori. Çështja tjetër është se edhe kjo rritje prej 5% minusohet për shkak të vlerës së lartë të inflacionit. Njëjtë vlen edhe për rritjen e buxhetit, ku rritja prej 5% në vlerën prej katër miliardë euro, edhe pse është një rritje e mirë prej 250 milionë euro, nuk mund të krahasohet me rritjen prej 3% të buxhetit të një shteti tjetër me buxhet 25 miliardë euro”, ka shtuar Jusaj.
Tutje, Jusaj ka folur edhe për premtimet dhe vizitat që politikanët iu bëjnë gjatë kohës së fushatës zgjedhore.
“Ne iu kemi thënë të gjithëve gjatë takimeve me ta se do t’i mbajmë për fjalë për premtimet e dhëna, të cilat edhe i kemi të incizuara, sepse takimet kanë qenë publike. Pas datës 7 qershor, kushdo që do të udhëheqë me qeverinë, do t’u kërkojmë përgjegjësi dhe për atë përgjegjësi jemi të gatshëm edhe të ballafaqohemi me ta, edhe në debate, edhe në takime tjera”, ka shtuar Jusaj.
Sipas Jusajt, qëllimi i komunitetit të biznesit nuk është përfitimi personal, por që me përkrahjen e bizneseve të rriten të hyrat buxhetore, të cilat kthehen në investime kapitale dhe krijohen vende të reja pune.
The post Jusaj: Partitë politike me programe të mira për bizneset, por mungon implementimi appeared first on Gazeta Express.
