Parlamenti i Sllovenisë i dha të premten mandatin e katërt si kryeministër politikanit nacionalist Janez Janša.
Më herët gjatë kësaj jave, Janša njoftoi se partia e tij, Partia Demokratike Sllovene (SDS), kishte arritur të formonte një koalicion me disa parti të djathta në Kuvend, duke i hapur rrugën rikthimit në krye të qeverisë.
Janša mori mbështetjen e 51 nga 87 deputetët që votuan në Asamblenë Kombëtare të premten.
Rikthimi i tij në pushtet konsiderohet si një forcim i ri i populizmit të djathtë në Europë, pas largimit nga pushteti të kryeministrit hungarez Viktor Orbán në zgjedhjet e muajit të kaluar në Hungari.
Në zgjedhjet parlamentare të marsit, Janša humbi ngushtë përballë kandidatit liberal Robert Golob, i cili më pas dështoi të formonte qeverinë dhe dha dorëheqjen, duke kaluar në krye të opozitës.
“Të tjerë u përpoqën të krijonin një koalicion shumice, por dështuan. Ne iu qasëm ndryshe, mbi bazë programore dhe hap pas hapi”, deklaroi Janša pas votimit.
Edhe presidentja e Komisionit Europian, Ursula von der Leyen, përgëzoi Janšën për rikthimin në pushtet, duke theksuar se pret “bashkëpunim për përballimin e sfidave të përbashkëta”.
The post Rikthehet në pushtet Janez Jansa, Parlamenti i Sllovenisë e zgjedh kryeministër për herë të katërt appeared first on Gazeta Express.
