Kampionët nuk kanë humbur kohë. Vetëm pak ditë pas festës së titullit të tretë radhazi, KB Trepça ka nisur menjëherë ndërtimin e skuadrës për edicionin 2026/27, duke zyrtarizuar dy lëvizje të rëndësishme në merkato.
Skuadra mitrovicase ka vazhduar kontratën me amerikaniin me përvojë, Kenny Hasbrouck, një nga liderët kryesorë të “Minatorëve” në sezonin e kaluar dhe basketbollist që dha kontribut të madh në rrugëtimin drejt titullit kampion.
39-vjeçari ishte një nga figurat më stabile të ekipit, duke sjellë eksperiencë dhe qetësi në momentet vendimtare.
Në anën tjetër, Trepça ka siguruar edhe përforcimin e parë vendor, pasi ka nënshkruar me talentin, Rron Dahsyla, i cili vjen nga KB Vëllaznimi.
21-vjeçari konsiderohet një nga basketbollistët më premtues vendorë dhe sezonin e kaluar u dallua me paraqitje solide në Superligë, duke qenë ndër lojtarët më të rëndësishëm të skuadrës gjakovare.
Sipas burimeve, këto nuk pritet të jenë lëvizjet e fundit të kampionëve aktualë, të cilët kanë nisur punën menjëherë pas përfundimit të sezonit dhe po synojnë të ndërtojnë edhe një skuadër më të fortë për mbrojtjen e titullit dhe garat ndërkombëtare.
