Një person 31-vjeçar ka humbur jetën të enjten, më 21 maj 2026, në Vushtrri, pasi dyshohet se ka rënë nga një ndërtesë.
Lajmin për Telegrafin e ka konfirmuar Ilmi Prekazi nga Drejtoria Rajonale e Policisë në Mitrovicë, duke bërë të ditur se rasti është raportuar si rënie nga një kat i një ndërtese që ishte në ndërtim e sipër.
“Policia në Vushtrri ka pranuar informatën se një person i gjinisë mashkullore, ka rënë nga një kat i një ndërtese e cila është në ndërtim e sipër në Vushtrri. Njësitë policore kanë dalë në vendin e ngjarjes. Personi i lënduar është dërguar për trajtim mjekësor në emergjencën e spitalit të qytetit në Vushtrri. Njësitë policore kanë filluar me veprimet hetimore për sqarimin e rrethanave të rastit”, ka deklaruar Prekazi.
Ai shtoi se nga emergjenca e spitalit të Vushtrrisë është konfirmuar se i lënduari nuk ka arritur t’u mbijetojë plagëve.
“Nga emergjenca e spitalit të Vushtrrisë është konfirmuar se si pasojë e lëndimeve të pësuara, personi ka humbur jetën”, ka thënë Prekazi.
Policia ka nisur hetimet për të sqaruar rrethanat e rastit. /Telegrafi/
