SHBA-ja ka ngritur akutakuzë ndaj ish-udhëheqësit kuban Raúl Castro për komplot për vrasjen e shtetasve amerikanë dhe krime të tjera lidhur me rrëzimin e dy avionëve në vitin 1996 mes Kubës dhe Floridës.
Rasti i bërë publik të mërkurën akuzon Castron dhe pesë persona të tjerë për rrëzimin e avionëve që i përkisnin grupit kubano-amerikan Brothers to the Rescue, ku humbën jetën katër persona, përfshirë tre amerikanë, shkruan BBC
Castro, tani 94 vjeç, ishte në atë kohë kreu i forcave të armatosura të vendit dhe u përball me dënim ndërkombëtar pas incidentit.
Ndërsa SHBA-ja po përpiqet të rrisë presionin ndaj sundimit komunist në Kubë, presidenti Miguel Díaz-Canel i quajti akuzat “një manovër politike, pa asnjë bazë ligjore”.
Duke folur në Freedom Tower në Miami, Prokurori i Përgjithshëm në detyrë Todd Blanche njoftoi se SHBA-ja do ta akuzojë Castron edhe për shkatërrim avionësh dhe katër akuza individuale për vrasje lidhur me vdekjen e Armando Alejandre Jr, Carlos Alberto Costa, Mario Manuel de la Peña dhe Pablo Morales.
“Shtetet e Bashkuara dhe Presidenti Trump nuk i harrojnë dhe nuk do t’i harrojnë qytetarët e tyre,” tha Blanche.
Akuzat duhet të shqyrtohen në një gjykatë amerikane dhe disa prej tyre mund të çojnë në burgim të përjetshëm. Akuzat për vrasje mbartin dënim maksimal me vdekje ose burgim të përjetshëm.
Akuzat e reja të Departamentit të Drejtësisë synojnë një figurë kyçe të udhëheqjes komuniste kubane në një kohë kur ajo përballet me presion të madh nga SHBA-ja për reforma të rëndësishme politike dhe ekonomike në sistemin njëpartiak.
SHBA-ja ka vendosur sanksione ndaj vendit dhe ka imponuar bllokadë ndaj naftës për Kubën, gjë që ka sjellë ndërprerje të energjisë dhe mungesa ushqimore.
Më herët të mërkurën, Sekretari amerikan i Shtetit Marco Rubio publikoi një mesazh për popullin kuban me rastin e ditës së pavarësisë së vendit.
“Presidenti Trump po ofron një rrugë të re mes SHBA-së dhe një Kube të re,” tha Rubio.
Rubio u tha qytetarëve të ishullit se konglomerati ushtarak kuban GAESA është kryesisht përgjegjës për ndërprerjet e energjisë dhe mungesat ushqimore që vendi vazhdon të përjetojë.
The post SHBA-ja akuzon Castron e Kubës për vrasje lidhur me rrëzimin e dy aeroplanëve në vitin 1996 appeared first on Gazeta Express.
